اسلام آباد ہائی کورٹ نے ایگزیکٹ کمپنی کے مالک کی رہائی سے متعلق مقامی عدالت کے فیصلے کے خلاف دائر درخواست کی سماعت دو ہفتوں کے لئے ملتوی کر دی

جمعرات 16 فروری 2017 16:24

اسلام آباد ۔ (اُردو پوائنٹ اخبارتازہ ترین - اے پی پی۔ 16 فروری2017ء) اسلام آباد ہائی کورٹ نے ایگزیکٹ کمپنی کے مالک شعیب شیخ کی رہائی سے متعلق مقامی عدالت کے فیصلے کے خلاف دائر درخواست کی سماعت دو ہفتوں کے لئے ملتوی کر تے ہوئے وفاق کے وکیل کو حکم دیا ہے کہ آئندہ سماعت پر اس کی قانونی حثیت پر دلائل دیئے جائیں ۔جمعرات کو کیس کی سماعت جسٹس اطہر من اللہ نے کی۔

اس موقع پر وفاق کی جانب سے ڈپٹی اٹارنی جنرل راجہ خالد عدالت میں پیش ہوئے اور موقف اختیار کیا کہ مقامی عدالت کا فیصلہ شہادتوں کو سنے بغیر دیا گیا۔

(جاری ہے)

مقامی عدالت کے اس فیصلے کو کالعدم قرار دیا جا ئے ۔ راجہ خالد نے مذید کہا کہ شعیب شیخ سمیت مزید 26 افراد منی لانڈرنگ میں ملوث ہیں۔شعیب شیخ کے وکیل رضوان عباسی نے کہا کہ درخواست زائد المیعاد ہے اس کو خارج کیا جا ئے تو وفاق کے وکیل نے عدالت کو بتایا کہ اگر درخواست ریاست کی جانب سے دائر ہو تو اس کی میعاد 6 ماہ تک ہوتی ہے۔

جس پر عدالت نے راجہ خالد سے استفسار کیا کہ آپ نے یہ درخواست اینٹی منی لانڈرنگ یا پھر ضابطہ فوجداری کے تحت دائر کی ہے ،آئندہ سماعت پر اس درخواست سے متعلق عدالت کو آگاہ کیا جائے ۔عدالت نے کیس کی سماعت دو ہفتوں تک ملتوی کر دی ۔