بلوچستان میں امن پاکستان کے استحکام کے لیے ضروری ہے ،سی پیک منصوبہ کی ترقی سے بلوچستان کے عوام کو بلاامتیاز مستفید کیا جائے

لاہور (اُردو پوائنٹ اخبارتازہ ترین - آئی این پی۔ 21 فروری2017ء) جماعت اسلامی پاکستان کے سیکرٹری جنرل اور صدر مرکزی مجلس قائمہ برائے سیاسی پارلیمانی امور لیاقت بلوچ نے کہاہے کہ بلوچستان میں امن پاکستان کے استحکام کے لیے ضروری ہے ۔سی پیک منصوبہ کی ترقی سے بلوچستان کے عوام کو بلاامتیاز مستفید کیا جائے۔ وہ منگل کومنصورہ میں بلوچستان اور فاٹا کے وفود سے ملاقات میں گفتگو کررہے تھے ۔

لیاقت بلوچ نے گفتگو کرتے ہوئے کہاہے کہ بلوچستان میں امن پاکستان کے استحکام کے لیے ضروری ہے ۔سی پیک منصوبہ کی ترقی سے بلوچستان کے عوام کو بلاامتیاز مستفید کیا جائے ۔ گوادر کے عوام کا حق ہے کہ روزگار ، ہنر مندی ، پینے کا صاف پانی اور بہتر رہائشی سہولتیں دی جائیں ۔بلوچستان کے عوام کی غالب اکثریت محب دین اور محب وطن ہے ۔

(جاری ہے)

لیاقت بلوچ نے کہاکہ پاکستان اور افغانستان میں امن دونوں ممالک کے عوام کے جان ، مال ، عزت اور ترقی روزگار کے لیے ناگزیر ہے ۔

افغانستان کے حکمران جرأت کا مظاہرہ کرتے ہوئے امریکہ اور بھارت کے شکنجے سے نکلیں اور پاکستان کی طرف دوستی کا ہاتھ بڑھائیں ۔ افغانستان کی سرزمین پاکستان ، ایران ، چین اور وسطی ایشیا کے خلاف استعمال کی جارہی ہے ۔لیاقت بلوچ نے کہاکہ قومی ایکشن پلان پر بلاامتیاز اور غیر جانبداری سے عملدرآمد کیا جائے ۔ مساجد ، مدارس ، مذاکرات کے خلاف پراپیگنڈا ، دین بے زار اور لادین مقتدر طبقہ کا دھندہ ہے ۔ دہشتگردی اور کرپشن یک جان دو قالب ہیں ۔ کرپشن قومی سلامتی کے لیے خطرہ بن گئی ہے ۔ جماعت اسلامی ملک بھر سے نظریاتی ، معاشی اور جمہوری کرپشن کے خاتمہ کے لیے فیصلہ کن کردار ادا کرے گی ۔