پاکستان کا بارودی سرنگوں کے دھماکوں اور حملوں میں محفوظ رہنے والی خصوصی بکتر بند گاڑیوں کی تیاری کیلئے امریکی کمپنی سے معاہدہ

لندن(اُردو پوائنٹ اخبارتازہ ترین - این این آئی۔ 22 فروری2017ء) پاکستان نے بارودی سرنگوں کے دھماکوں اور گھات لگاکر کیے گئے حملوں میں محفوظ رہنے والی خصوصی بکتر بند گاڑیوں کی تیاری کے لیے امریکی کمپنی سے معاہدہ کرلیا۔ ہفت روزہ برطانوی دفاعی میگزین آئی ایچ ایس جینز ڈیفنس نے اپنی رپورٹ میں انکشاف کیا کہ پاکستان نے امریکی کمپنی نویستار ڈیفنس سے 3 کروڑ 50 لاکھ ڈالر کا معاہدہ کیا ہے۔

رپورٹ کے مطابق معاہدے کے تحت نویستار ڈیفنس پاکستان کو 40 مائن ریزسٹنٹ ایمبٴْش پروٹیکٹڈ (ایم آر اے پی) میکس پرو ڈیش ڈی ایکس ایم وہیکلز تیار کرکے دیگا۔میدان جنگ کے لیے تیار کی جانے والی اس گاڑی کی خصوصیت یہ ہے کہ یہ بارودی سرنگ کے دھماکے اور گھات لگاکر کیے گئے حملوں کے خلاف مزاحمت کی صلاحیت رکھتی ہے۔

(جاری ہے)

پاکستان اور امریکی کمپنی کے درمیان ہونے والے اس معاہدے کی تصدیق امریکی محکمہ دفاع کی جانب سے 16 فروری کو جاری ہونے والے بیان میں بھی کی گئی تھی۔

میگزین کے مطابق امریکی ساختہ میکس پرو ڈیش افغانستان کے قندھار ایئرفیلڈ میں تعینات ہیں اور امریکی فوج نے نویستار ڈیفنس کو پاکستان کے لیے ایسی 40 گاڑیاں تیاری کرنے کا ٹھیکہ دیا ۔جریدے کے مطابق پاکستان اور امریکی کمپنی کے درمیان یہ معاہدہ امریکی فارن ملٹری سیلز کنٹریکٹ کے تحت ہوا جس میں متعدد سپورٹ آئیٹمز، کنٹریکٹر لاجسٹکس اور تکنیکی معاونت بھی شامل ہے ،ْخصوصی وہیکلز کی تیاری کا یہ منصوبہ اکتوبر 2018 تک مکمل ہوجائے گا جبکہ پروجیکٹ پر امریکی ریاست میسی سیپی کے علاقے ویسٹ پوائنٹ اور پاکستان میں کام کیا جائے گا۔معاہدے کیلئے پیشکشوں کی درخواست انٹرنیٹ کے ذریعے طلب کی گئی تھیں جس کے ذریعے نویستار ڈیفنس کو کنٹریکٹ دیا گیا۔