گینز ریکارڈ کے بارے میں منفی پراپیگنڈہ پاکستان کے وقار پر کاری ضرب ہے صوبائی وزیر رانا مشہود،یوتھ فیسٹیول کی وجہ سے دنیا میں پاکستان کے ابھرتے ہوئے سافٹ امیج کے خلاف یہ ایک گہری سازش ہے، گینز سے معاہدہ آفیشل ویب سائٹ پر موجود ہے، ہم منفی ہتھکنڈوں سے گھبرانے والے نہیں ، مزید گینز ریکارڈ قائم کرکے دکھائیں گے،صوبائی وزیر کھیل کی پریس کانفرنس،عالمی ریکارڈ پاکستانیوں کیلئے باعث فخر ہیں، اظہر جاوید

اتوار 6 اپریل 2014 04:16

لاہور(اُردو پوائنٹ اخبار آن لائن۔6اپریل۔2014ء)صوبائی وزیر کھیل رانا مشہود احمد خان نے کہا ہے کہ گینز ریکارڈ کے حوالے سے منفی پراپیگنڈہ پاکستان کے مفاد اور وقار پر کاری ضرب ہے، پنجاب یوتھ فیسٹیول کے باعث پاکستان کے دنیا میں ابھرتے ہوئے سافٹ امیج کے خلاف یہ ایک گہری سازش ہے ۔ پنجاب یوتھ فیسٹیول کے باعث گنیز ورلڈریکارڈز کی وجہ سے ہی پاکستان کا ٹیلنٹ دنیا کے سامنے آیا ، یوتھ فیسٹیول اور گینز ریکارڈز کے مابین جو معاہدہ ہوا جس کا مسودہ آفیشل ویب سائٹ پر موجود ہے۔

انگلینڈ سے آئی نوجوانوں کی کرکٹ ٹیم اورگورنمنٹ کالج یونیورسٹی کی کرکٹ ٹیم کے مابین میچ کے موقع پر جی سی یو گراؤنڈ میں ڈی جی سپورٹس بورڈ پنجاب عثمان انور کے ساتھ پریس کانفرنس کرتے ہوئیصوبائی وزیر کھیل رانا مشہود احمد خان نے کہا کہ گزشتہ برس بھی ہم نے گینز کے ساتھ ورلڈ ریکارڈز بنانے کا معاہدہ کیا اور اس سال بھی دوبارہ معاہدے پر دستخط کئے گئے جن لوگوں نے منفی پراپیگنڈہ کیا ہم ان کے خلاف قانونی چارہ جوئی کا حق محفوظ رکھتے ہیں۔

(جاری ہے)

ہمارا گینز ریکارڈز کی ٹیم سے رابطہ ہوچکا ہے جس کے بعد قانونی مشاورت کر کے عدالت سے رجوع کریں گے ۔ہفتہ وار چھٹی کے باعث وہ کل اس بارے میں اپنا مئوقف پیش کریں گے، گینز ریکارڈنے دنیا کے سب سے بڑے پرچم کا ریکارڈپاکستان سے منسوب کر دیا ہے جسے کوئی بھی ویب سائٹ پر چیک کرسکتا ہے جبکہ باقی ماندہ ریکارڈز بھی جلد پاکستان کے نام کر دیے جائیں گے۔

انہوں نے کہا کہ ہم منفی ہتھکنڈوں سے گھبرانے والے نہیں اور اب مزید گینز ریکارڈ قائم کرکے دکھائیں گے۔انہوں نے کہا کہ گزشتہ برس نگران حکومت نے یوتھ فیسٹیول کا آڈٹ کرایاجس میں ایک بھی اعتراض سامنے نہیں آیا جبکہ اس مرتبہ ہم نے تمام معاملات شفاف انداز میں چلانے کیلئے 12 کمیٹیاں قائم کی ہیں۔ ان کا کہنا تھا کہ گرم موسم کے بعد انٹرنیشنل یوتھ فیسٹیول ستمبر میں منعقد ہوگا جس میں کرکٹ کے ویٹرنز کھلاڑیوں سمیت دیگر کھیلوں کی غیر ملکی ٹیمیں پاکستان آئیں گی۔

اس موقع پر انگلینڈ پاک الیون کے چیف ڈی مشن اظہر جاوید نے کہا کہ دورہ پاکستان کا مقصد انگلینڈ میں پیدا ہونے والے نوجوانوں کو ان کے آباء و اجداد کی سرزمین پر لانا اور پاکستانی کلچر سے روشناس کرانا ہے۔ انہوں نے کہا کہ پنجاب یوتھ فیسٹیول کی کامیابی انگلینڈ میں مقیم پاکستانیوں کے لئے بھی فخر کا باعث ہے جس میں کئی ورلڈ ریکارڈز قائم کئے گئے۔