ججز نظر بندی کیس،مشرف کو ایک دن کا استثنیٰ ،تفتیشی افسر پھر تبدیل کر دیا گیا،غداری کیس میں تحقیقاتی رپورٹ پرفیصلہ ،تحقیقاتی رپورٹ آفیشل سیکرٹ ایکٹ کے زمرے میں نہیں آتی کہ اسے مخفی رکھا جائے۔بیرسٹر فروغ، رپورٹ سیکرٹ ایکٹ کے زمرے میں آتی تو میڈیا پر بھی نشر نہ ہوتی،جسٹس فیصل عرب

ہفتہ 26 اپریل 2014 07:58

اسلام آباد(اُردو پوائنٹ اخبار آن لائن۔26اپریل۔2014ء) غداری کیس میں ایف آئی اے کی تحقیقاتی رپورٹ حاصل کرنے سے متعلق مشرف کی درخواست پر فیصلہ محفوظ کر لیا گیا جبکہ دوسری طرف ججز نظر بندی کیس کا تفتیشی افسر پھر تبدیل کر دیا گیا۔اسلام آباد میں خصوصی عدالت میں ایف آئی کی تحقیقاتی رپورٹ حاصل کرنے کی پرویز مشرف کی درخواست کی سماعت ہوئی۔سابق صدر کے وکیل بیرسٹر فروغ نے جمعہ کو بھی اپنے دلائل جاری رکھے۔

ان کا کہنا تھا کہ ملک میں آفیشل سیکرٹ ایکٹ موجود ہے تاہم تحقیقاتی رپورٹ آفیشل سیکرٹ ایکٹ کے زمرے میں نہیں آتی کہ اسے مخفی رکھا جائے۔پراسیکیوٹر طارق حسن نے کہا کہ وہ یہ نہیں کہہ رہے کہ تحقیقاتی رپورٹ آفیشل سیکرٹ ایکٹ کے زمرے میں آتی ہے جس پر جسٹس فیصل عرب نے ریمارکس دئیے کہ رپورٹ سیکرٹ ایکٹ کے زمرے میں آتی تو میڈیا پر بھی نشر نہ ہوتی۔

(جاری ہے)

دلائل مکمل ہونے کے بعد عدالت نے ایف آئی اے کی تحقیقات رپورٹ حاصل کرنے سے متعلق پرویز مشرف کی درخواست پر فیصلہ محفوظ کر لیا جبکہ مقدمہ کی مزید سماعت اٹھائیس اپریل تک ملتوی کر دی گئی ہے۔دوسری طرف ججز نظر بندی کیس کا تفتیشی افسر پھر تبدیل کر دیا گیا۔انسپکٹر غلام مصطفیٰ کیانی کو ججز بندی کیس کا دوبارہ تفتیشی افسر مقرر کر دیا گیا ہے۔

اب تک اس کیس کے سات تفتیشی افسر تبدیل کیے جا چکے ہیں۔سپیشل پبلک پراسیکیوٹر عامر ندیم تابش نے کہا ہے کہ بار بار تفتیشی افسر تبدیل کرنے سے تفتیش متاثر ہو رہی ہے۔ پرویز مشرف کے دونوں ضمانتی راشد محمود اور مشتاق احمد انسداد دہشتگردی عدالت پیش ہو گئے۔اس دوران پرویز مشرف کی جانب سے حاضری سے استثنیٰ کی درخواست عدالت میں پیش کی گئی۔پرویز مشرف کراچی میں پی این ایس شفا اور آغا ہسپتال سے علاج کر رہے ہیں ،پراسیکیوٹر عامر ندیم تابش نے مشرف کی استثنیٰ کی درخواست پر اعتراض کرتے ہوئے کہا کہ درخواست کے ساتھ پرویز مشرف کی میڈیکل رپورٹ نہیں لگائی گئی لہٰذا اس کو مسترد کیا جائے جس کے بعد عدالت نے پرویز مشرف کو حاضری سے ایک دن کا استثنیٰ دے دیا۔

ججزنظر بندی کیس کی سماعت 9 مئی تک ملتوی کر دی گئی۔ جبکہ غدا ری کیس کیس کی مزید سماعت 28 اپریل کو ہو گی۔

متعلقہ عنوان :