موٹرسائیکل کے مزار پردعا، ”بلٹ بابا“یہ سفر پر نکلے ہوئے لوگوں کی حفاظت کرتا ہے،عقیدت مند

پیر 5 مئی 2014 07:51

راجستھان(اُردو پوائنٹ اخبار آن لائن۔5مئی۔2014ء)بھارت کی شمال مشرقی ریاست راجستھان میں سڑک کے کنارے واقع ایک مزار پر لوگ دعا کے لیے رکتے ہیں جہاں ان کی منتیں پوری کرنے والا کوئی اور نہیں بلکہ ’بلٹ بابا‘ نامی ایک موٹر سائیکل ہے۔ اس قدیم موٹر سائیکل کے بارے میں عقیدت مندوں کا کہنا ہے یہ سفر پر نکلے ہوئے لوگوں کی حفاظت کرتا ہے۔مقامی ریڈیو سٹیشن ’نیوز 18 راجستھان‘ کے مطابق برطانوی کمپنی کا رائل اینفیلڈ بْلٹ نامی ماڈل کا یہ موٹر سائیکل ’بندیاری‘ نامی گاوٴں میں رکھا ہوا ہے۔

’مزار‘ پر موجود ایک عقیدت مند کا کہنا تھا کہ میں اس جگہ کئی مرتبہ آ چکا ہوں۔ میں جب بھی یہاں سے گذرتا ہوں، اپنی گاڑی سے اتر کر اوم بنًا سے دعا مانگتا ہوں کہ میرا آگے کا سفر حفاظت سے گذرے۔

(جاری ہے)

سنہ 1988 میں ’اوم بنًا‘ نامی ایک نوجوان اپنے 350 سی سی کے رائل اینفیلڈ بلٹ موٹر سائیکل پر جا رہا تھا کہ ایک درخت سے ٹکرانے کے بعد ہلاک ہو گیا۔

مقامی لوگوں کا کہنا ہے کہ اس نوبیاہتا نوجوان کی ناگہانی موت کے بعد سے اس کا موٹر سائیکل ڈرائیور کے بغیر خود ہی چلتا ہوا اس درخت تک آ جاتا تھا جہاں یہ حادثہ ہوا تھا۔ حتیٰ کہ بعد میں جب ایک پولیس افسر اس موٹر سائیکل کو پنجاب لے گیا، پھر بھی موٹر سائیکل اپنے مالک کی یاد میں چلتا ہوا واپس اس درخت تک آ جاتا تھا۔کچھ لوگوں کا ماننا ہے کہ موٹر سائیکل مافوق الفطرت صلاحیتوں کا مالک ہے۔

ایک شخص نے مقامی ریڈیو سٹیشن کے نمائندے کو بتایا کہ ایک مرتبہ اوم بنًا کی روح نے اسے مشکل سے بچایا اور اسے بیس ہزار روپے بھی دیے۔مزار پر موجو موٹر سائیکل شیشے کے بنے ہوئے ایک ڈبے میں پڑا ہوا ہے اور اس پر عقیدت مندوں نے پھولوں کے ہار بھی چڑھائے ہوئے ہیں۔ موٹر سائیکل کے علاوہ عقیدت مند اس درخت کے سامنے بھی منّتیں مانتے ہیں جہاں اوم بنا کا حادثہ ہوا تھا۔

مرنے کے بعد اوم بنًا کی روح اور ان کے موٹر سائیکل کی روحانی طاقت کی شہرت محض مقامی لوگوں تک ہی محدود نہیں، بلکہ لوگوں کو سفری سہولیات فراہم کرنے والی برطانیہ کی کپمنی ’ٹرِپ ایڈوائزر‘ نے اپنی ویب سائیٹ پر اس مزار کے حوالے سے ایک خاص صفحہ بھی ترتیب دیا ہوا ہے۔ کمپنی کا کہنا ہے کہ یہ مزار ان کے لیے بھی خوش بختی کا باعت ثابت ہوا تھا کیونکہ اسی مزار کی برکت کی بدولت انہیں اپنا ایک کیمرہ بھی مل گیا تھا جو وہ مزار پر پہنچنے سے پہلے سفر کے دوران کھو چکے تھے۔

بھارت میں سڑک کے کنارے مزاروں کا ہونا کوئی غیر معمولی بات نہیں، لیکن سرکاری اہلکار ایسے مزاروں کے خلاف اقدامات کرتے ہیں جو ان کے خیال میں ٹریفک میں خلل پیدا کرتے ہیں۔ سنہ 2009 میں ملک کی سپریم کورٹ نے سرکاری زمین پر ایک مذہبی عمارت کی تعمیر روک دی تھی، تاہم سپریم کورٹ ایسے مزاروں کے خلاف کوئی فیصلہ نہیں سناتی جو سڑک کے کنارے پہلے سے ہی موجود ہیں۔

Facebook Twitter Google + Share on Whatsapp

موٹرسائیکل کے مزار پردعا، ”بلٹ بابا“یہ سفر پر نکلے ہوئے لوگوں کی حفاظت کرتا ہے،عقیدت مند

پیر 5 مئی 2014 کی مزید خبریں