پاک فضائیہ کی خیبر ایجنسی میں کارروائی، 21 مبینہ دہشت گرد ہلاک،متعدد ٹھکانے تباہ

ہفتہ 28 نومبر 2015 09:45

پشاور(اُردو پوائنٹ اخبارآن لائن۔28نومبر۔2015ء) وفاق کے زیر انتظام قبائلی علاقے فاٹا کی خیبر ایجنسی میں کارروائی کے نتیجے میں 21 مبینہ دہشت گرد ہلاک ہوگئے۔میڈیارپورٹس کے مطابق سیکورٹی ذرائع نے بتایا ہے کہ جمعہ کو پاک فضائیہ کے جیٹ طیاروں نے خیبر ایجنسی کی وادی تیراہ کے علاقے کوکی خیل میں دہشت گردوں کے مبینہ ٹھکانوں کو نشانہ بنایا۔ کاروائی میں 21 مبینہ دہشت گرد ہلاک جبکہ ان کے متعدد ٹھکانے تباہ ہوگئے تاہم انتہائی دورافتادہ مقام ہونے اورعلاقے تک میڈیا کو رسائی نہ ہونے کی وجہ سے ہلاکتوں کی آزادانہ ذرائع سے تصدیق مشکل ہے۔

یاد رہے کہ وفاق کے زیرِ انتظام پاک افغان سرحد پر واقع شمالی وزیرستان، خیبر ایجنسی اور اورکزئی ایجنسی سمیت سات ایجنسیوں کو عسکریت پسندوں کی محفوظ پناہ گاہ سمجھا جاتا ہے۔

(جاری ہے)

حکومت اور کالعدم تحریک طالبان پاکستان کے درمیان امن مذاکرات کی ناکامی اور کراچی ایئرپورٹ پر حملے کے بعد پاک فوج نے 15 جون کو شمالی وزیرستان میں آپریشن ضربِ عضب شروع کیا تھا۔

شمالی وزیرستان کی تحصیل میرعلی کو دہشت گردوں سے خالی کروانے کے بعد سیکیورٹی فورسز نے آپریشن کا دائرہ کار شمالی وزیرستان کے دوردراز علاقوں تک بڑھا دیا۔بعد ازاں خیبر ایجنسی اور ملحقہ علاقوں میں آپریشن ’خیبر ون‘ اور 'خیبر ٹو' کے تحت سیکیورٹی فورسز نے کارروائیوں کا آغاز کیا، جن کا اب اختتام ہوچکا ہے۔تاہم 16 دسمبر 2014 کو پشاور کے آرمی پبلک اسکول پر کالعدم تحریک طالبان پاکستان (ٹی ٹی پی) کے حملے کے نتیجے میں معصوم بچوں سمیت 150 سے زائد افراد کی ہلاکت کے بعد سیکیورٹی فورسز نے دہشت گردوں کے خلاف کارروائیاں مزید تیز کردی ہیں