برہان وانی کی شہادت سے کشمیریوں کی تحریک آزادی میں نیا جوش پیدا ہوا ہے‘ بھارتی مظالم کی وجہ سے مقبوضہ کشمیر جل رہا ہے‘بین الاقوامی برادری مسئلہ کشمیر کو حل کرانے کیلئے اپنا کردار ادا کرے

صدر آزاد کشمیر سردار مسعود خان کا امریکہ میں مقیم کشمیریوں اور پاکستانیوں سے خطاب

اتوار 25 ستمبر 2016 12:04

واشنگٹن (اُردو پوائنٹ اخبارآن لائن۔25ستمبر۔2016ء) صدر آزاد کشمیر سردار مسعود خان نے کہا ہے کہ برہان وانی کی شہادت سے سات دہائیوں سے حق خودارادیت کیلئے لڑنے والے کشمیریوں کی تحریک آزادی میں نیا جوش پیدا کیا ہے‘ بھارتی مظالم کی وجہ سے مقبوضہ کشمیر جل رہا ہے‘بین الاقوامی برادری مسئلہکشمیر کو حل کرانے کیلئے اپنا کردار ادا کرے۔ ان خیالات کا اظہار انہوں نے ہفتہ کو امریکہ میں مقیم کشمیریوں اور پاکستانیوں سے خطاب کرتے ہوئے کیا۔

انہوں نے پاکستانی اور کشمیری تارکین وطن کو مقبوضہ کشمیر میں 8 جولائی کو مقبوضہ کشمیر کے نوجوان رہنما برہان وانی کی شہادت کے بعد پیدا ہونے والی تازہ ترین صورتحال سے آگاہ کیا۔ انہوں نے کہا کہ برہان وانی کی شہادت سے سات دہائیوں سے حق خودارادیت کیلئے لڑنے والے کشمیریوں کی تحریک آزادی میں نیا جوش پیدا کیا ہے۔

(جاری ہے)

صدر مسعود خان نے کہا کہ بھارتی مظالم کی وجہ سے مقبوضہ کشمیر جل رہا ہے۔

انہوں نے کہا کہ گزشتہ دو ماہ کے دوران سینکڑوں کشمیری مرد‘ عورتوں اور بچوں کو شہیدکیا گیا ہے‘ 150 سے زائد شہری پیلٹ گنز کے استعمال کے باعث اپنی بینائی کھو بیٹھے ہیں جبکہ 10 ہزار سے زائد کشمیری بھارتی قابض فوج کی اندھا دھند فائرنگ کی وجہ سے زخمی ہوئے ہیں۔ انہوں نے کہا کہ مقبوضہ کشمیر میں طویل کرفیو لگایا گیا ہے جبکہ موبائل اور ٹیلی فون سروس بھی منقطع کی گئی ہے۔

سردار مسعود خان نے پاکستانی اور کشمیری تارکین وطن کو آزاد کشمیر میں گڈگورننس کے حوالے سے اٹھائے گئے اقدامات سے آگاہ کیا۔ انہوں نے وزیراعظم پاکستان محمد نواز شریف کی جانب سے اقوام متحدہ کی جنرل اسمبلی میں مسئلہ کشمیر کو جرات مندانہ انداز میں اٹھانے پر ان کی تعریف کی۔ صدر آزاد کشمیر نے مقبوضہ کشمیر میں جاری بھارتی جبر کے خلاف پاکستانی اور کشمیری نوجوانوں کی فعال شرکت کیلئے سات نکاتی حکمت عملی پیش کی۔ انہوں نے کشمیری تارکین وطن پر زور دیا کہ وہ کشمیر کاز کے فروغ کیلئے تمام وسائل بروئے کار لائیں۔ صدر آزاد کشمیر نے بین الاقوامی کمیونٹی پر زور دیا کہ مقبوضہ کشمیر کو حل کرانے کیلئیاپنا کردار ادا کریں۔