سیکیورٹی فورسز اور انٹیلی جنس ایجنسیاں کراچی میں امن کی بحالی کیلئے صوبائی حکومت کے ساتھ مل کر آپریشنز جاری رکھیں، جنرل راحیل شریف

آرمی چیف کا کورہیڈ کواٹرکا دورہ ، فوجی مشقوں میں شرکت ، فارمیشنز کی حربی صلاحیتوں اور آپریشنل تیاریوں پر مکمل اطمینان کا اظہار پاک فوج کے سربراہ نے سیکیورٹی کانفرنس کی بھی صدارت کی ، کور کمانڈر ڈی جی آئی ایس آئی ، ڈی جی ایم آئی، ڈی جی ایم او اور ڈی جی رینجرز کی شرکت

جمعرات 10 نومبر 2016 11:44

کراچی(اُردو پوائنٹ اخبارآن لائن۔10نومبر۔2016ء)آرمی چیف جنرل راحیل شریف نے سیکیورٹی فورسز اور انٹیلی جنس ایجنسیوں کو کراچی کے شہریوں کیلئے امن کی بحالی کی غرض سے قانون نافذ کرنیوالے اداروں اور صوبائی حکومت کے ساتھ مل کر آپریشنز جاری رکھنے کی ہدایت کی ہے جبکہ جنوبی کمانڈ کی جاری مشقوں کے معائنے کے دوران فارمیشنز کی حربی صلاحیتوں اور آپریشنل تیاریوں پر مکمل اطمینان کا اظہار کیا ہے ۔

آئی ایس پی آر کے مطابق چیف آف آرمی سٹاف جنرل راحیل شریف نے بدھ کو کور ہیڈ کواٹرز کراچی کا دورہ کیا اور جنوبی کمانڈ کی جاری مشقوں ،رزلینٹ رسپانس میں شرکت کی ۔ آرمی چیف کو مشقوں کے بارے میں تفصیلی بریفنگ دی گئی اور مشقوں میں شامل جارحانہ اور دفاعی آپریشنز کے بارے میں بتایا گیا آرمی چیف نے شرکاء سے خطاب کرتے ہوئے فارمیشنز کی حربی صلاحیتوں اور آپریشنل تیاریوں پر مکمل اطمینان کا اظہار کیا بعد ازاں آرمی چیف نے سیکیورٹی کانفرنس کی بھی صدارت کی جس میں کور کمانڈر ڈی جی آئی ایس آئی ، ڈی جی ایم آئی، ڈی جی ایم او اور ڈی جی رینجرز نے شرکت کی ۔

(جاری ہے)

سیکیورٹی اور فورسز اور انٹیلی جنس ایجنسیوں کی جانب سے کراچی میں امن و امان کی صورتحال بہتر بنانے کے سلسلہ میں حاصل کی گئی کامیابیوں کو سراہا ۔ چیف آف آرمی سٹاف نے قانون نافذ کرنیوالے اداروں اور صوبائی حکومت کے ساتھ مل کر کراچی کے شہریوں کیلئے امن کی بحالی کیلئے آپریشنز جاری رکھنے کی ہدایت کی ۔