پی ایس او کے تحت ڈیلرز کانفرنس کا انعقاد، کمپنی کی ترقی کے لیے مستقبل کے پرجوش منصوبوں پر تبادلہ خیال

کراچی ۔ (اُردو پوائنٹ اخبارتازہ ترین - اے پی پی۔ 25 ستمبر2017ء) پاکستان کی سب سے بڑی آئل مارکیٹنگ کمپنی کے تحت لاہور میں بزنس کانفرنس کا انعقاد کیا گیا جس میں کمپنی کے منیجنگ ڈائریکٹر اور چیف ایگزیکٹیوآفیسر شیخ عمران الحق نے پی ایس او کے بزنس پارٹنرز سے خطاب کیا۔ کانفرنس میں فیصل آباد، ساہیوال، گوجرانوالہ اور لاہور ڈویژن سے تعلق رکھنے والے پی ایس او کے ڈیلرز نے شرکت کی ۔

اس موقع پر پی ایس او کے اعلیٰ انتظامی عہدے داران نے پی ایس او کے کاروبار کی ترقی کے لیے اختیار کی جانے والی پرجوش حکمت عملی کے بارے میں تبادلہ خیال کیا ۔ پاکستان اسٹیٹ آئل کمپنی کے 3489 ریٹیل آئوٹ لیٹس ملک بھر میں پھیلے ہوئے ہیں۔ پی ایس او کے ریٹیل پارٹنرز نہ صرف عالمی معیار کی پیٹرولیم مصنوعات فراہم کررہے ہیںبلکہ نئی حکمت عملی کے تحت صارفین کو نان فیول ریٹیل مصنوعات کے ذریعے بھی سہولت فراہم کررہے ہیں۔

(جاری ہے)

پی ایس او کے مارکیٹنگ، لاجسٹکس، ٹی اینڈ او ڈی، کمیونی کیشنز ،فنانس، این ایف آر، آپریشنز، امپورٹ اور برانڈ ڈویژن کے سینئر انتظامی عہدے داران بھی کمپنی کے منیجنگ ڈائریکٹر کے ہمراہ اس کانفرنس میں شریک تھے جنہوں نے صارفین کی جانب سے نشاندہی کیے جانے والے امور کے بارے میں تبادلہ خیال کیا۔ کانفرنس سے خطاب کرتے ہوئے پی ایس او کے منیجنگ ڈائریکٹر اور سی ای او شیخ عمران الحق نے کہا کہ کمپنی کی ترقی کے لیے بزنس پارٹنرز کا کردار اہمیت کا حامل ہے۔

گزشتہ دو سال کے دوران پی ایس او کے منافع میں غیرمعمولی اضافہ عمل میں آیا ہے۔ اس قدر شاندار کارکردگی بزنس پارٹنرز کے پختہ عزم اورکمپنی سے گہری وابستگی کی وجہ سے ممکن ہوئی ہے۔پی ایس او کا تیزی سے بڑھتا ہوا ریٹیل کاروبار ایندھن کے شعبے میں کمپنی کے غلبہ کو تقویت فراہم کررہا ہے۔ ملک میں اعلیٰ معیار کے ماحول دوست RONمصنوعات بشمول Altron Premium, Altron X اور Action+ Diesel متعارف کرانے جیسے اقدامات پی ایس او کے ڈیلرز کے تعاون کے بغیر ممکن نہیں تھے۔

شیخ عمران الحق نے کہا کہ پی ایس او کی کاروباری حکمت عملی میں کاروباری پارٹنرز کو فوائد پہنچانے کے نئے مواقع فراہم کرنے کو بھی ترجیح حاصل ہے۔ پی ایس او نے اپنے ریٹیل نیٹ ورک پر عالمی معیار کے ایندھن کی فراہمی کے ساتھ اضافی سہولتوں کی فراہمی کے لیے بھی انقلابی اقدامات کیے ہیں جن میں پی ایس او لائلٹی فیول کارڈز، برانچ لیس بینکاری کی خدمات کی فراہمی، اے ٹی ایم کی سہولت اور جدید سہولتوں سے آراستہ شاپ اسٹاپ کنوینینٹ اسٹور شامل ہیں جن کی وجہ سے صارفین کے لیے سہولتوں میں اضافے کے ساتھ ڈیلرز کی آمدن میں بھی اضافے کو ممکن بنایا جارہا ہے۔

پی ایس او بزنس پارٹنرز کو کمپنی کی ترقی کے منصوبوں کے بارے میں آگہی فراہم کرنے کے لیے اس طرز کی کانفرنسز کا انعقاد باقاعدگی کیا جاتا ہے۔ یہ دوطرفہ تبادلہ خیال پی ایس او کے کارباری نظام کا اہم حصہ ہے جس سے صارفین کو بہترین خدمات کی فراہمی کی کوششوں کو موثر بنانے میں مدد ملتی ہے۔