عالمی تجارت میں پاکستان کے حصے کو بڑھانے کیلئے متحرک اور فعال ریسرچ سیل ناگزیر ہے،میاں محمد ادریس

پیر 25 ستمبر 2017 20:43

فیصل آباد۔ (اُردو پوائنٹ اخبارتازہ ترین - اے پی پی۔ 25 ستمبر2017ء) فیڈریشن آف پاکستان چیمبرز آف کامرس اینڈ انڈسٹری کے سابق صدر میاں محمد ادریس نے کہا ہے کہ عالمی تجارت میں پاکستان اور بالخصوص فیصل آباد کے حصے کو بڑھانے کیلئے ایک مکمل متحرک اور فعال ریسرچ اینڈ ڈویلپمنٹ سیل ناگزیر ہے اور اس سلسلہ میں فیصل آباد چیمبر آف کامرس اینڈ انڈسٹری کے موجودہ عہدیداروں کی کاوشیں لائق تحسین ہیں۔

وہ پیر کے روز یہاں ایف سی سی آئی کی تیسری منزل پر قائم ہونے والے نئے آر اینڈ ڈی سیکشن کی باضابطہ افتتاحی تقریب سے خطاب کر رہے تھے۔ اس موقع پر فیصل آباد چیمبر آف کامرس اینڈانڈسٹری کے صدر انجینئر محمدسعید شیخ ، سینئر نائب صدر رانا محمد سکندر اعظم خاں ، نائب صدر انجینئر احمد حسن ، سابق صدر شیخ محمد خالد حبیب اور سیکرٹری جنرل عابد مسعود کے علاوہ ڈائریکٹرآراینڈ ڈی ایم ڈی طاہر بھی موجود تھے۔

(جاری ہے)

میاں محمد ادریس نے کہا کہ انہوں نے اپنے دور صدارت میں ہی آر اینڈ ڈی سیل کی اہمیت کو تسلیم کر لیا تھا اور اس سلسلہ میں فوری طور پر سیل بھی قائم کر دیا گیا،اس سیل کی وجہ سے فیصل آباد چیمبر آف کامرس اینڈ انڈسٹری کو نہ صرف قومی سطح پر تسلیم کیا جائیگا بلکہ حکومتی ادارے بھی اس کی رائے کو پالیسی سازی میںزیادہ اہمیت دیں گے۔ انہوں نے کہا کہ گزشتہ چند سالوں میں صنعت و تجارت کے شعبے نے انتہائی تیزی سے ترقی کی ہے جس کی وجہ سے عالمی سیاسی رجحانات ، معیشت، ٹیکنالوجی ، نئی ایجادات اور سماجی اقتدار نے صنعت و تجارت کی جدید سائنسی خطوط پر ترقی کیلئے نئی راہیں کھول دی ہیں۔

انہوں نے کہا کہ ان کے خیال میں دنیا میں صرف ٹیکنالوجی کے شعبہ میں جس تیزی سے ترقی ہوئی ہے اس نے ریسرچ اینڈ ڈویلپمنٹ کی اہمیت کو مزید بڑھا دیا ہے۔ انہوں نے کہا کہ ریسرچ اینڈ ڈویلپمنٹ کے شعبہ کو دنیا کے ہر کونے میں ہونے والی متعلقہ ایجادات ، تبدیلیوں اور رجحانات کا مکمل ادراک ہونا چاہیئے تا کہ وہ موجودہ صنعتوں کی اپ گریڈیشن کے ساتھ ساتھ نئی قائم ہونے والی صنعتوں کیلئے بھی ایک واضح روڈ میپ کا تعین کر سکے۔