انڈسٹریل ٹریننگ پروگرام 2018کے بارے میں اسلام آباد چیمبر آف کامرس اینڈ انڈسٹری میں آگاہی سیمینار

اسلام آباد (اُردو پوائنٹ اخبارتازہ ترین - آئی این پی۔ 20 نومبر2017ء) پنجاب سکلز ڈویلپمنٹ فنڈ (پی ایس ڈی ایف) نے اسلام آباد چیمبر آف کامرس اینڈ انڈسٹری کے اشتراک سے انڈسٹریل ٹریننگ پروگرام 2018کے بارے میں ایک آگاہی سیمینارکا انعقاد کیا، ٹریننگ پروگرام کو حکومت پنجاب اور برطانیہ کا ڈیپارٹمنٹ فار انٹرنیشنل ڈویلپمنٹ فنڈنگ فراہم کر رہے ہیںاور اس کا مقصد صنعتی و پیداواری اداروں کو ہنر مند و تربیت یافتہ افرادی قوت فراہم کرنا ہے۔

پروگرام کے بارے میں تفصیلی پریزینٹیشن دیتے ہوئے پنجاب سکلز ڈویلپمنٹ فنڈکی ایسوسی ایٹ پروگرام ڈویلپمنٹ محترمہ سحر ندیم نے کہا کہ فارمل ٹریننگ فراہم کرنے اداروں کی بجائے ان کا ادارہ براہ راست صنعتی و پیداواری اداروں کو یہ موقع فراہم کر رہا ہے کہ وہ مارکیٹ سے خام افرادی قوت اٹھائیں اور ان کو اپنی ضرورت کے مطابق تربیت فراہم کر کے اپنے ہی ادارے میں روزگار فراہم کریں جبکہ ان کا ادارہ ایسی ٹریننگ کے تمام اخراجات برداشت کرے گا۔

(جاری ہے)

انہوں نے کہا کہ اس پروگرام کا مقصد غریب اور کم پڑھے لکھے افرادکو تربیت یافتہ اور ہنر مند بنانا ہے تا کہ وہ باعزت روزی کمانے کے قابل ہوں اور صنعتی ترقی میں اپنا فعال کردار ادا کر سکیں۔پنجاب و اسلام آباد میں واقع صنعتی و دیگر کاروباری ادارے یا صنعتوں کے بااختیار سروس سنٹرز باقاعدہ بڈنگ کے ذریعے اس پروگرام حصہ لے سکتے ہیں جبکہ بڈنگ کے کاغذات جمع کرانے کی آخری تاریخ 25نومبر 2017ہے۔

بڈ نگ جیتنے والے صنعتی و کاروباری ادارے خود تربیت حاصل کرنے والے افراد کا انتخاب کریں گے، ان کو مطلوبہ شعبے میں ٹریننگ فراہم کریں گے ا ور پھر ایسے تربیت یافتہ افراد میں سے پچاس فیصد کو اپنے ہی ادارے میں ملازمت فراہم کریں گے جبکہ ٹریننگ کے تمام اخراجات پی ایس ڈی ایف اٹھائے گا۔ اس طرح یہ پروگرام نہ صرف بے روزگاری میں کمی کرنے میں مدد گار ثابت ہو گا بلکہ صنعتی و کاروباری اداروں کی افرادی قوت کی ضروریات کو بھی پورا کرنے میں معاون ثابت ہو گا۔

سمینار سے خطاب کرتے ہوئے اسلام آباد چیمبر آف کامرس اینڈ انڈسٹری کے صدر شیخ عامر وحید نے کہا کہ صنعتی و کاروباری اداروں کیلئے یہ ایک اچھا موقع ہے کہ وہ پنجاب حکومت کے اس پروگرام سے استفادہ حاصل کر کے اپنی ضرورت کے مطابق تربیت یافتہ اور ہنر مند افراد تیار کرنے کی کوشش کریں۔ انہوں نے کہا کہ صنعتی، سروسز اور دیگر کاروباری شعبوں میں نت نئی ایجادات ہو رہی ہیں اور نئی نئی ٹیکنالوجیز مارکیٹ میں آ رہی ہیں لہذا ہنر مندی و پیشہ وارانہ تربیت فراہم کرنے والے ادارے جدید دور کے بدلتے ہوئے تقاضوں کے مطابق تربیتی نصاب تشکیل دے کر نوجوانوں کو تربیت فراہم کرنے پر توجہ دیں تا کہ نوجوان صنعتی و کاروباری اداروں کی ترقی میں موثر کردار ادا کر سکیں۔

اسلام آباد چیمبر آف کامرس اینڈ انڈسٹری کے سینئر نائب صدر محمد نوید اور نائب صدر نثار احمد مرزا نے کہا کہ سی پیک منصوبے کیلئے پاکستان کو زیادہ سے زیادہ تربیت یافتہ افراد تیار کرنے کی ضرورت ہے جبکہ صنعتی شعبے کیلئے بھی جدید ہنر مندی اور تربیت سے لیس افرادی قوت کی ضرورت بڑھتی جا رہی ہے لہذا انہوں نے اس بات پر زور دیا کہ تربیت فراہم کرنے والے ادارے موجودہ تناظر میں اپنے تربیتی پروگرام ترتیب دیں تا کہ ہنر مند اور تربیت یافتہ افراد تیار ہونے سے ہمار ا ملک تیز رفتار اقتصادی ترقی کی راہ پر گامزن ہو سکے۔