تو یہ ہمارا ہی نقصان ہوا نا

آج بے بس وزیرِاعظم کو سڑک کی ایک اور ٹکڑی پر 25 ارب روپے تارکول بنا کر انڈیلنے پر جو شاک ہوا سو ہوا مگر ان کی ایک گُل افشانی نے چاچا تاسین کی یاد دلا دی۔ ملازمت کے نئے نئے دن تھے، سمجھوتوں سے ابھی تعارف بھی نہیں ہوا تھا، ذہن، دل اور ناک ابھی ایک ہی سیدھ میں تھے کہ چاچا تاسین میرے ہتھے چڑھ گیا۔ تاسین (Petty) پیٹی کنٹریکٹر تھا، شریف، محنتی اور کنجوسوں کا امام العصر۔

تب بیس پچیس ہزار والے ٹھیکے اور سپلائی آرڈر لیتا تھا۔ لیبر اس کی گھر کی تھی جس کا زیادہ سے زیادہ جیب خرچ یا معاوضہ دو روپے یومییہ تھا۔ رکھ چراگاہ میں ایک تجرباتی تعمیر جاری تھی، شفیع ٹھیکیدار میری ’حرکتوں‘ سے تنگ آ کر اور کام ادھورا چھوڑ کر بھاگ گیا تھا۔ یہ کام تاسین کو تفویض ہوا۔ چاچا تاسین کے معیار سے یہ اس کا پہلا میگا پراجیکٹ تھا جس کی تکمیل پر اس کے اور میرے مستقبل کا انحصار تھا۔

(جاری ہے)

سیمنٹ کی چوری ہر ٹھیکیدار کا بنیادی حق ہے جسے وہ چھپ کر اور کھل کر استعمال کرتا ہے مگر یہاں معاملہ ریت کی چوری کا بھی آن پڑا تھا۔ رکھ چراگاہ کی مٹی ریتلی تھی اور مہندی کی کاشت کے لئے موزوں۔ یہی مہندی ’مہندی بھیرے دی‘ کے نام سے بکتی ہے۔ شفیع اسی ریت کو دریائی ریت سمجھ کر استعمال کرنے پر اور پھر بھاگنے پر مجبور ہوا اور اب چاچا تاسین بھی یہی کچھ کرنا چاہتا تھا۔

تاسین عمر رسیدہ، تجربہ کار اور چُپ شاہ قسم کا شخص تھا۔ اس نے سب سے پہلے تو میری آنکھوں میں جھونکنے کے لئے ایک دو ٹرک اچھی قسم کی ریت کے منگواےٴ اور لگا کھالے سے نکلی ہوئی ریت استعمال کرنے۔ خون میں تب حدت کچھ زیادہ ہی تھی، سو اسے اصلی ریت استعمال کرنے پر مجبور ہونا ہی پڑا۔ پراجیکٹ ختم ہوا تو چاچا تاسین شکایت لے کر آ گیا ’آپ کی وجہ سے میرا اتنے ہزار کا نقصان ہو گیا‘۔

اور کوئی جواب نہ بن پڑا تو میں نے کہا ’چاچا نقصان وُقصان تو کچھ نہیں ہوا تمہیں البتہ تم نے منافع کا جو مارجن اپنے ذہن میں طے کر رکھا تھا اس میں کچھ کمی ریت کے دس بیس ٹرکوں کی وجہ سے ضرور آئی ہو گی جسے تم نقصان سمجھ رہے ہو‘‘ تاسین نے اقرار میں سر ہلاتے ہوےٴ کہا ’تو یہ میرا نقصان ہی ہوا نا‘ آج جناب وزیر اعظم کی بات سے چاچا تاسین کی بات یاد آ گئی۔ ’یہ جو اڑھائی ارب کی پٹرول ڈیزل پر ہم سبسڈی دے رہے ہیں یہ ہمارا نقصان ہی ہوا نا، یہ کسی میگا پراجیکٹ میں لگتا تو کچھ تو فائدہ ہوتا‘۔

ادارہ اردوپوائنٹ کا مضمون نگار کی رائے سے متفق ہونا ضروری نہیں ہے۔