سیلابی ریلا گڈو بیراج پہنچ گیا ،گھوٹکی میں کئی دیہات زیر آب

بدھ 17 ستمبر 2014 11:20

گھوٹکی(اُردو پوائنٹ اخبار تازہ ترین۔17ستمبر 2014ء)متعدد گھر اور فصلیں تباہ ،پانی کی آمد 50 ہزار 843 کیوسک تک جا پہنچی پنجاب میں تباہی کے بعد سیلابی ریلا سندھ میں گڈو بیراج پہنچنا شروع ہوگیا ۔ گھوٹکی میں کئی دیہات زیر آب آگئے ، رحیم یار خان ، ڈیرہ غازی خان ، راجن پور اور شہر سلطان کی مزید کئی آبادیاں بھی پانی کی لپیٹ میں آگئیں ۔ پنجاب میں ہزاروں دیہات ، گھروں ، فصلوں کو نیست و نابود کرتا دریائے چناب کا سیلابی ریلا سندھ میں گڈو بیراج پہنچنا شروع ہوگیا ہے ۔

ہیڈ پنجند پر پانی میں کمی جبکہ گڈو بیراج پر پانی کی سطح بلند ہو رہی ہے ۔ گڈو کے مقام پر پانی کی آمد 3 لاکھ کیوسک سے تجاوز کرگئی ہے ۔ بیراج کے قریب بڑے رقبے پر کھڑی فصلیں بھی پانی کی لپیٹ میں آگئی ہیں ۔

(جاری ہے)

سکھر بیراج پر پانی کی آمد 1 لاکھ اٹھہتر ہزار کیوسک اور گھوٹکی بیراج پر پانی کی آمد 50 ہزار 843 کیوسک تک جا پہنچی ہے ۔ سیلابی پانی نے کچے کے درجنوں دیہات ڈبو دیئے ہیں ۔

زمینی رابطہ منقطع ہونے کے باعث سیکڑوں افراد پھنسے ہوئے ہیں ۔ علی پور کے علاقے خان گڑھ اور شجاع آباد میں بھی سیکڑوں بستیاں پانی کی لپیٹ میں ہیں ۔ دریائی کٹاؤ کے باعث شہر سلطان کے متعدد علاقے بھی سیلاب کی زد میں آگئے ۔ ٹھٹھہ سیال ، مراد آباد اوربھٹہ پور سمیت مظفر گڑھ کے درجنوں علاقے بھی ڈوبے ہوئے ہیں ۔ ڈیرہ غازی خان میں شیخانی کے مقام پر شوڑیا نالے کا بند ٹوٹنے سے بھی بڑا علاقہ زیر آب آگیا ۔