آبیانہ وصولی کے نظام کو کمپیوٹرائزڈ کرنے کیلئے طریقہ کار وضع کیا جا ئے‘ صوبائی وزیر آبپاشی،

نہری انتظام و انصرام پر ہونے والے اخراجات پورا کرنے کے لئے آبیانہ کی مکمل وصولی انتہائی نا گزیر ہے‘ میاں یاور زمان

پیر 2 مارچ 2015 21:16

لاہور ( اُردو پوائنٹ اخبارتازہ ترین - این این آئی۔2مارچ۔2015ء) صوبائی وزیر آبپاشی و چیئرمین پیڈا میاں یاور زمان نے کہا ہے کہ آبیانہ کی ہر ممکن وصولی کسان تنظیموں کی بنیادی ذمہ داری ہے جبکہ ادارہ جاتی اصلاحات پروگرام کی کامیابی کا دارومدار آبیانہ کی سو فیصد وصولی سے مشروط ہے۔ یہ بات انہوں نے اپنے دفتر میں آبیانہ وصولی کی صورت حال کا جائزہ لینے کے لئے منعقدہ اجلاس کی صدارت کے دوران کہی۔

اجلاس میں پیڈا کے جنرل مینجر چوہدری خاور نذیر ، جنرل مینجر (آپریشن) ملک محمد طارق ، ڈپٹی جنرل مینجر (ٹی ایم) افضل انجم طوراور ڈپٹی جنرل مینجر (آپریشن) میاں عبدالرشید کے علاوہ دیگر متعلقہ افسران بھی موجود تھے ۔اجلا س میں صوبائی وزیر کو پیڈا کے زیر انتظام ایریا واٹر بورڈ ز میں آبیانہ کی مجموعی صورت حال کے بارے میں آگاہ کیا گیا۔

(جاری ہے)

صوبائی وزیریاور زمان نے کہا کہ پنجاب حکومت کسان برادری کی بہتری کے لئے دن رات کوشاں ہے اور پیڈا کے زیر انتظام کسان تنظیموں کی تشکیل حکومت کا کسان برادری پر مکمل اعتماد کا واضح ثبوت ہے۔

تاہم ان تنظیموں کے کسان ممبران پر بھی ذمہ داری عائد ہوتی ہے کہ وہ حکومت کے اس اعتماد پر پورا اترتے ہوئے اپنے پیشہ وارانہ فرائض دلجمعی سے ادا کریں ۔انہوں نے مزید کہا کہ نہری انتظام و انصرام پر ہونے والے اخراجات پورا کرنے کے لئے آبیانہ کی مکمل وصولی انتہائی نا گزیر ہے جس کے بغیر نہری نظام کو مربوط بنیادوں پر قائم رکھنا مشکل ہو گا ۔

انہوں نے ہدایت کی کہ فیلڈ سٹاف اور کسان تنظیموں کو آبیانہ وصولی کے لئے بھر پور معاونت فراہم کی جائے تا کہ سرکاری واجبات حکومتی خزانے میں بروقت جمع ہوں۔ صوبائی وزیر آبپاشی میاں یاور زمان نے مزید ہدا یت کی کہ آبیانہ کے نظام کو جلد از جلد کمپیوٹرائزڈ کرنے کیلئے طریقہ کار وضع کیاجائے تا کہ آبیانہ وصولی کے نظام کو شفاف اور تیز تر بنایا جا سکے۔

لاہور میں شائع ہونے والی مزید خبریں