پاکستان کا معاشی مستقبل گوادر پورٹ سے جڑا ہوا ہے‘ کامران مائیکل

گوادر سے کاشغر تک سڑک کے روابط کو تیزی سے پایہ تکمیل تک پہنچا یا جا رہا ہے ،80فیصد تعمیراتی کا مکمل ہوچکا

بدھ 1 اپریل 2015 20:54

لاہور ( اُردو پوائنٹ اخبار تازہ ترین۔یکم اپریل۔2015ء) وفاقی وزیر برائے بندرگاہ و جہازرانی کامران مائیکل نے کہا ہے کہ پاکستان کا معاشی مستقبل گوادر پورٹ سے جڑا ہوا ہے، حکومت گوادر پورٹ کے منصوبہ کو مظبوط تر بنا کر ملکی معاشی ترقی و خوشحالی کی راہ ہموار کر رہی ہے،پاکستان اپنے دوست ملک چین کے ساتھ گوادر سے کاشغر تک سڑک کے روابط کو بھی تیزی سے پایہ تکمیل تک پہنچا رہا ہے جس کا 80فیصد تعمیراتی کا مکمل ہوچکا ہے۔

ان خیالات کا اظہار انہوں نے سیالکوٹ میں اخبارنویسوں سے دوران گفتگو کیا۔وفاقی وزیر نے کہا کہ گوادر سے کاشغر تک شاہراہ کی تعمیر سے یہ منصوبہ ایک معاشی ایکسپریس وے بن جائے گا ایک مربوط حکمت عملی کے تحت اس سلسلہ میں تیزی سے کام جاری ہے۔ کامران مائیکل نے مذید کہا کہ گوادر پورٹ منصوبہ سے پاکستان اور چائنہ کے مابین معاشی و انسانی ترقی اور خوشحالی کے ایک سنہرے دور کا آغاز ہوگا۔

(جاری ہے)

انہوں نے کہا کہ چائنہ کی طرف سے جلد ہی پاکستان کو 4ہزار میگا واٹ بجلی فراہم ہو جائے گی جس سے پاکستان میں بجلی کا بحران 2017تک ختم ہو جائے گا۔ وفاقی وزیر نے کہا کہ موجودہ حالات کا تقاضہ ہے کہ ملک میں نئی صنعتوں کے فروغ کے لئے صنعتکاروں کو ہر ممکنہ سہولیات بہم پہنچائی جائیں۔ نئی صنعتوں کے قیام سے غربت کا خاتمہ ہو گا، ملکی برآمدات بڑھیں گی جس سے ملک کے زر مبادلہ کے ذخائر میں بھی اضافہ ہو گا۔

انہوں نے کہا کہ ہم نے آئندہ نسلوں کو محفوظ اور روشن پاکستان دینا ہے جس کے لئے وزیر اعظم نواز شریف کے معاشی ترقی کے وژن کی تکمیل ازحد ضروری ہے۔ حکومت ملک کی بزنس کمیونٹی کو درپیش مسائی سے بخوبی آگا ہ ہے اور ان کے موثر حل کے لئے مثبت اقدامات کر رہی ہے۔ انہوں نے کہا کہ حکومت معاشی و اقتصادی ترقی کے ایجنڈے پر کامیابی سے عمل پیرا ہے۔ قبل ازیں وفاقی وزیر برائے بندرگاہ و جہاز رانی کامران مائیکل نے مقامی نجی سکول بحریہ گرائمر ہائی سکول سیالکوٹ میں منعقدہ سالانہ تقریب تقسیم انعامات میں شرکت کی اور نمایاں کارکردگی دکھانے والے طلباء طالبات میں انعامات تقسیم کئے۔

اراکین صوبائی اسمبلی چوہدری طارق اختر سبحانی، ذوالفقار غوری، نیول ریکروٹمنٹ آفیسر طارق جمیل اور سکول پرنسپل مس خان بھی اس موقع پر موجود تھیں۔

متعلقہ عنوان :

لاہور میں شائع ہونے والی مزید خبریں