حکومت آزادی مارچ نہیں روکے گی لیکن امن خراب نہیں کرنے دیا جائے گا ، عابد شیرعلی

بدھ 6 اگست 2014 13:48

حکومت آزادی مارچ نہیں روکے گی لیکن امن  خراب نہیں کرنے دیا جائے گا ، ..

ملتان(اُردو پوائنٹ تازہ ترین اخبار۔6اگست 2014ء) وزیر مملکت برائے پانی و بجلی عابد شیر علی کا کہنا ہے کہ مسلم لیگ (ن) کے پیپلز پارٹی سے اختلافات ہیں لیکن اس کے باوجود دونوں جماعتیں ملک اور جمہوریت کےلئے ایک ساتھ ہیں۔ میپکو ہیڈ کوارٹر ملتان میں پرچم کشائی کی تقریب سے خطاب کے دوران عابد شیرعلی کا کہنا تھا کہ ملک حالت جنگ میں ہے، ایسے وقت میں پاکستان انتشارکی سیاست کا متحمل نہیں ہوسکتا، عمران خان کی غیر پارلیمانی گفتگو سے ملک دشمنوں کو فائدہ ہوگا۔

عمران خان سب کو برا کہتے ہیں، سمجھ میں نہیں آتا کہ آخر وہ کس کے ساتھ ہیں؟۔ وہ عمران خان کو وزیر اعظم نواز شریف کی جانب سے محبت کا پیغام دیتے ہیں، عمران خان آئیں، ہم مل کرملک کو درپیش مسائل حل کرتے ہیں۔

(جاری ہے)

انہوں نے کہا کہ موجودہ حکومت کو عوام نے 5 سال کے لئے منتخب کیا ہے، عمران خان اقتدار کے لئے آئندہ انتخابات کا انتظار کریں، اس کے لئے انہیں بادشاہت نہیں بلکہ اپنی آمرانہ سوچ ختم کرنا ہوگی۔

وزیر مملکت کا کہنا تھا کہ حکومت آزادی مارچ کو نہیں روکے گی لیکن امن و عامہ کی صورتحال کو ضرور برقرار رکھا جائے گا۔ انہوں نے کہا کہ ان کی جماعت اور پیپلز پارٹی کے چند معاملات پر اختلافات ضرور ہیں لیکن دونوں جماعتیں جمہوریت اور پاکستان کے لئے ایک ساتھ ہیں۔