تحریک انصاف کو جلسے کی اجازت، رکاوٹ نہیں ڈالی جائے گی: چودھری نثار

بدھ 13 اگست 2014 21:19

اسلام آباد(اُردو پوائنٹ اخبار تازہ ترین۔13اگست۔2014ء) وفاقی وزیر داخلہ چودھری نثار علی خان نے کہا کہ جلسوں کی صرف اجازت دینا ہی نہیں، اسے تحفظ فراہم کرنا بھی حکومت کی ذمہ داری ہے۔ پُرتشدد ہجوم کی دھمکی پر نہ تو اسمبلیاں تحلیل ہو سکتی ہیں اور نہ ہی کسی ملک کا وزیراعظم مستعفیٰ ہو سکتا ہے۔سیاسی تماشوں کی وجہ سے عوام کی تکالیف پرمعذرت خواہ ہیں.اسلام آباد میں ایک اہم پریس کانفرنس سے خطاب میں وزیر داخلہ چودھری نثار علی خان کا کہنا تھا کہ حکومت کسی بھی جلسے اور کسی سیاسی یا جمہوری عمل میں رکاوٹ نہیں ڈالے گی۔

لاہور ہائیکورٹ کے فیصلے کا انتظار کر رہے تھے اس لئے دیر ہو گئی۔ چودھری نثار علی خان کا کہنا تھا کہ حکومت کا کام صرف جلسوں کی اجازت دینا ہی نہیں بلکہ اس کو تحفظ فراہم کرنا بھی ہوتا ہے۔

(جاری ہے)

تحریک انصاف نے ماضی میں بھی اسلام آباد میں جلسہ کیا تو حکومت نے مکمل سیکیورٹی فراہم کی تھی۔ ان کا کہنا تھا کہ کچھ عناصر دھرنے کے بھیس میں سیاسی نظام کو دھمکیاں دے رہے تھے۔

کسی عمل میں تشدد کا پہلو نظر آئے تو حکومت کا فرض ہے کہ وہ لوگوں کے جان و مال کا تحفظ کرے۔ میڈیا سے گفتگو میں ان کا کہنا تھا کہ پاک فوج ملکی تاریخ کی سب سے بڑی اور مشکل ترین جنگ لڑ رہی ہے۔ دہشتگردی کیخلاف جنگ صرف پاک فوج کی نہیں بلکہ پوری قوم کی ہے۔ ہم پاکستان کو شام، عراق یا صومالیہ نہیں بننے دیں گے۔ انہوں نے کہا کہ پُرتشدد ہجوم کی دھمکی پر نہ تو اسمبلیاں تحلیل ہو سکتی ہیں اور نہ ہی کسی ملک کا وزیراعظم مستعفیٰ ہو سکتا ہے۔ پارلیمنٹ کو گھر نہیں بھیجا جا سکتا، آئین کی کسی شق کے تحت ٹیکنو کریٹس کی حکومت نہیں بن سکتی