تحریک انصاف کے صدر جاوید ہاشمی کا قومی اسمبلی کی رکنیت سے استعفیٰ منظور

جمعرات 4 ستمبر 2014 18:56

اسلام آباد(اُردو پوائنٹ اخبار تازہ ترین۔4ستمبر۔2014ء) اسپیکر قومی اسمبلی ایاز صادق نے پاکستان تحریک انصاف کے صدر جاوید ہاشمی کا اسمبلی رکنیت سے استعفیٰ منظور کرلیا۔

(جاری ہے)

نجی ٹی وی کے مطابق جاوید ہاشمی نے بدھ کے روز پارلیمنٹ کے مشترکہ اجلاس کے دوران اپنے استعفے کا اعلان کیا تھا جسے اسپیکر قومی اسمبلی نے منظور کرتے ہوئے الیکشن کمیشن کو ارسال کردیا جہاں ضروری کارروائی کے بعد حتمی نوٹی فکیشن کا اعلان کیا جائے گا۔

واضح رہے کہ 2013 کے انتخابات میں صدر تحریک انصاف جاوید ہاشمی ملتان کے حلقہ این اے 149 سے منتخب ہوئے تھے جبکہ اس سے قبل جاوید ہاشمی مسلم لیگ(ن) سے منسلک تھے اور وزیراعظم نواز شریف کے گزشتہ دو ادوار میں وفاقی وزیر رہے اور 1999 میں جنرل (ر) پرویز مشرف کی جانب سے نواز شریف حکومت کے خاتمے کے بعد جب شریف برادران ایک معاہدے کے تحت 10 سال کے لئے سعودی عرب گئے تو انہیں پارٹی صدرکا بنا دیا گیا تھا۔