حق کیلئے نکلنے پر پارلیمنٹ میں بیٹھے افراد ہمیں دہشت گرد اور باغی قرار دے رہے ہیں، طاہر القادری

جمعرات 4 ستمبر 2014 20:25

اسلام آباد(اُردو پوائنٹ اخبار تازہ ترین۔4ستمبر۔2014ء) پاکستان عوامی تحریک کے سربراہ ڈاکٹر طاہرالقادری کا کہنا ہے کہ کارکنوں کے صبر سے ظالموں کا مقابلہ کریں گے جب کہ حق کے لئے نکلنا بغاوت نہیں ہوتا لیکن پارلیمنٹ میں بیٹھے لوگ ہمیں دہشتگرد اور باغی قرار دے رہے ہیں۔پارلیمنٹ ہاؤس کے سامنے انقلاب مارچ کے شرکا سے خطاب کرتے ہوئے ڈاکٹر طاہرالقادری کا کہنا تھا کہ پارلیمنٹ کے مشترکہ اجلاس میں ہمیں گالیاں دی جارہی ہیں، کسی ایک رکن کو توفیق نہیں ہوئی ہے کہ وہ جرات کر کے حکومت سے سوال کرے کہ ہزاروں افراد پارلیمنٹ کے سامنے کیوں آئے ہیں اور انہیں کون سے دکھ اور مصیبتیں ہیں جس کی وجہ سے وہ یہاں جمع ہیں۔

انہوں نے کہا کہ پارلیمنٹ جواب دے کہ مظلوموں کی آواز نہ سننے کا ذمہ دار کون ہے، جس دن سانحہ ماڈل ٹاؤن برپا ہوا اس دن ایوان میں بیٹھے افراد کیوں نہ جاگے اور سوا دو ماہ کے بعد ایف آئی آر درج ہوئی لیکن ابھی تک کوئی ملزم گرفتار نہیں کیا گیا۔

(جاری ہے)

سربراہ عوامی تحریک کا کہنا تھا کہ سانحہ ماڈل ٹاؤن کے ٹریبونل کی رپورٹ نے پنجاب حکومت اور وزیراعلی شہبازشریف کو ذمہ دار قرار دیا گیا جب کہ وزیراعظم اور وزیراعلیٰ ٹریبونل کی رپورٹ دبا کر بیٹھے ہیں اوراسےعوام کے سامنے کیوں نہیں لایا جارہا۔

انہوں نے کہا کہ پارلیمنٹ اگر آئین میں ترمیم کردیں کہ حکمران غریبوں کا قتل کردیں تو ان پر مقدمہ نہیں بنے گا تو پھر ہم دھرنا ختم کرکے واپس چلے جائیں گے۔ڈاکٹر طاہرالقادری نے کہا کہ چینی صدر نہیں آرہے تو یہ حکومت کی ناکامی ہے، اگر وہ اسلام آباد آئے تو عوامی تحریک کے کارکنان ان کا والہانہ استقبال کریں گے تاہم حکمرانوں کا خاتمہ کئے بغیر اسلام آباد سے نہیں جائیں گے۔