بغیر تیل کے ہر قسم کے پروٹین کھانے سے 165کلو وزن کم کیا ہے ‘ عدنان سمیع

بدھ 26 نومبر 2014 11:48

بغیر تیل کے ہر قسم کے پروٹین کھانے سے 165کلو وزن کم کیا ہے ‘ عدنان سمیع

ممبئی (اُردو پوائنٹ تاز ترین اخبار۔ 26نومبر 2014ء) دنیا کے سب سے تیز پیانو نواز ہونے کی شہرت رکھنے والے پاکستانی گلوکار عدنان سمیع نے کہا ہے کہ بغیر تیل کے ہر قسم کے پروٹین کھانے سے 165کلو وزن کم کیا ہے ۔ بی بی سی کو دیئے گئے انٹرویو میں عدنان نے موسیقی کے سفر، ازدواجی زندگی اور 165 کلو وزن کم کرنے کے ساتھ نئی زندگی کا آغاز کرنے پر کھل کے بات کی۔

انہوں نے کہاکہ میں نے 165 کلو وزن کم کیا ہے بہت لوگوں کو یہ لگتا ہے کہ میں نے وزن ڈاکٹروں کے تعاون سے کم کیا ہے اور اس سے بھی کمال کی بات تو یہ ہے کہ بہت سے ڈاکٹر جنھیں میں جانتا بھی نہیں اس بات کا کریڈٹ لینے لگے ہیں اور ان میں سے بعض تو اس کا اشتہار بھی دینے لگے ہیں۔انھوں نے کہا کہ حقیقت یہ ہے کہ میں نے ایک ہائی پروٹین خوراک کے نظام کو اپنایا جس کے تحت میں ہر قسم کے پروٹین کھا سکتا تھا شرط صرف اتنی تھی کہ وہ بغیر تیل کے ہوں عدنان سمیع کا کہنا ہے کہ وزن کم کرنے کے بعد ان کی زندگی میں کئی تبدیلیاں آئیں جن میں ان کے لیے سب سے خوشگوار فلم کی پیشکش تھی۔

(جاری ہے)

انھوں نے بتایا کہ وزن کم ہونے کے بعد بہت ساری ایسی چیزیں ہونے لگیں جس کا مجھے پہلے سے قطعی اندازہ نہیں تھا۔ ان میں سے ایک اداکاری کی پیشکش بھی تھی۔ میں نے یہ طے کیا تھا کہ میں وہی فلم کروں گا جو مجھے چیلنج کرے۔انھوں نے کہا کہ میں نے ایک سکرپٹ پسند کیا ہے اور 2015 کے شروع میں شاید یہ فلم فلور پر جائے گی۔ یہ ایک فن فلم ہوگی اور میرا کردار نان میوزیکل ہوگا۔

انہوں نے کہاکہ میں بھارت میں انتہائی خوشی اور محبت سے رہ رہا ہوں اور یہ حقیقت ہے کہ بھارت میں مجھے کبھی کوئی دقت نہیں ہوئی۔عدنان اپنی موجودہ شریک حیات رویا کی تعریف کرتے نہیں تھکتے زندگی میں ضرور میں نے ایک کام اچھا کیا ہوگا کہ اوپر والے نے مجھے اتنا بڑا انعام دیا ہے اور وہ ہے رویا۔ وہ ایک فرشتے کی طرح میری زندگی میں آئی اور جس انداز سے اس نے مجھے سمیٹا ہے وہ شاید کوئی اور نہ کر پاتا۔