حکومت تحریک انصاف کے ساتھ غیر مشروط مذاکرات پر تیار

بدھ 10 دسمبر 2014 19:59

اسلام آباد(اُردو پوائنٹ اخبار تازہ ترین۔10دسمبر۔2014ء) وزیر خزانہ اسحاق ڈار نے کہا ہے کہ تحریک انصاف کیساتھ مذاکرات آئین اور قانون کے دائرے میں ہونگے، اصولوں پر سمجھوتہ نہیں ہوگا۔ جوڈیشل کمشن نے دھاندلی کی تصدیق کی تو حکومت کو اقتدار میں رہنے کا کوئی حق نہیں ہے۔اسلام آباد میں پریس کانفرنس کرتے ہوئے وفاقی وزیر خزانہ اسحاق ڈار نے کہا ہے کہ وزیراعظم نواز شریف اور کور کمیٹی نے فیصلہ کیا ہے کہ عمران خان کیساتھ مذاکرات کئے جائیں۔

حکومت تحریک اںصاف کیساتھ بامقصد اور غیر مشروط مذاکرات کیلئے تیار ہے۔ ہماری اپیل ہے کہ تحریک اںصاف آنے والے جلسے فوری طور پر ملتوی کردے۔ تحریک انصاف سے جلسے ملتوی کرنے کی اپیل کر رہے ہیں، مذاکرات شروع کرنے کیلئے شرط نہیں رکھ رہے۔

(جاری ہے)

تحریک اںصاف محب وطن پاکستانی ہونے کی حیثیت سے اپنا احتجاج ملتوی کردے۔ اسحاق ڈار نے کہا ہے کہ تحریک انصاف کے قائدین سے رابطے کی کوشش کر رہے ہیں۔

تحریک انصاف کے قائدین کو متعدد مرتبہ ٹیلی فون کرنے کی کوشش کی۔ تحریک اںصاف کے ساتھ بہت جلد بات چیت ہو جائے گی۔ امید ہے کہ کل مذاکرات کا پہلا دور شروع ہو جائے گا۔ ان کا کہنا تھا کہ آئینی طور پر آئی ایس آئی اور آئی بی جوڈیشل کمشن کا حصہ نہیں بن سکتی لیکن جوڈیشل کشمن دھاندلی کی تحقیقات کیلئے جس کو چاہے لے سکتی ہے۔ جوڈیشل کمشن خود چاہے تو دھاندلی کی تحقیقات کیلئے آئی ایس آئی یا آئی بی سے نمائندوں کو لے سکتی ہے۔

تحریک انصاف نے بھی مطالبہ کیا تھا کہ جوڈیشل کمشن کے نیچے آئی ایس آئی اور آئی بی کے نمائندوں کو شامل کیا جائے۔ ان کا کہنا تھا کہ میں اور احسن اقبال حکومتی مذاکراتی کمیٹی کے رکن ہونگے۔ تحریک انصاف بھی مذاکرات کیلئے اپنے اراکین کا اعلان کرے۔ دوسری جانب پی ٹی آئی کے وائس چیئرمین شاہ محمود قریشی کی جانب سے مذاکرات کا خیر مقدم کرتے ہوئے کہا گیا ہے کہ مذاکرات وہیں سے شروع کئے جائیں جہاں سے سلسلہ ٹوٹا تھا۔