کراچی ،پاکستان اسٹیٹ آئل کے پاس ایندھن کا سات دن کا ذخیرہ رہ گیا ،ملک میں پیڑول اور بجلی کے بحران میں مزید شدت متوقع ،

پی ایس او نے مالی بحران سے بچنے کیلئے حکومت سے فوری 50 ارب روپے مانگ لئے

جمعرات 15 جنوری 2015 23:12

کراچی ،پاکستان اسٹیٹ آئل کے پاس ایندھن کا سات دن کا ذخیرہ رہ گیا ،ملک ..

کراچی (اُردو پوائنٹ اخبار تازہ ترین۔15جنوری2015ء) پاکستان اسٹیٹ آئل کے پاس ایندھن کا سات دن کا ذخیرہ رہ گیا ہے، ملک میں پیڑول اور بجلی کے بحران میں مزید شدت متوقع ہے، پاکستان اسٹیٹ آئل نے مالی بحران سے بچنے کے لئے حکومت سے فوری طور پر 50 ارب روپے مانگ لئے۔ذرائع کے مطابق پی ایس او کا مالی بحران شدت اختیار کرچکا ہے، پاور سیکٹر ، پی آئی اے اور دیگر اداروں نے پی ایس او کو235 ارب روپے ادا کرنے ہیں۔

صرف پاور کمپنیوں پر واجب الادا رقم200 ارب تک پہنچ گئی ہیں۔دوسری جانب وصولی نہ ہونے کی وجہ سے ادائیگیوں سے قاصر پی ایس او کے ایل سیز اور اوور ڈرافٹ بھی بند ہوگئے ہیں، جس کے باعث ایندھن کی درآمدات تاخیر کا شکار ہوگئی ہے۔کمپنی زرائع کے مطابق اگر حکومت نے فوری طور پر 50 ارب نہ دیئے تو ایک ہفتے میں اسٹاک ختم ہوجائے گا، اس ضمن میں پی ایس او نے وزارتِ خزانہ کو مراسلے ارسال کردیئے ہیں۔

(جاری ہے)

اس سے قبل پی ایس او کی جانب سے وزارتِ پیڑولیم و قدرتی وسائل کو لکھے گئے خط میں پی ایس او نے باور کرا دیا تھا کہ اگر فوری طور پر واجب الادا ادائیگیاں نہیں کی گئیں تو پی ایس او کی جانب سے بجلی گھروں کو ایندھن کی فراہمی بند کر دی جائے گی ، مالی مشکلات کے باعث پی ایس او بینکوں کو ادا ئیگی سے قاصر ہے، جس کے باعث پی ایس او پر25 کروڑ روپے کے جرمانے بھی عائد کردیئے گئے ہیں۔واضح رہے کہ پی ایس او مختلف اداروں کی جانب سے وصولیاں نہ ہونے کے باعث شدید مالی بحران کا شکار ہے۔