آسٹریلیا ‘شدید بارش کی وجہ سے کرکٹ ورلڈ کپ میں بنگلہ دیش اور آسٹریلیا کا میچ منسوخ کر دیا گیا

ہفتہ 21 فروری 2015 15:20

برسبین (اُردو پوائنٹ تازہ ترین اخبار۔ 21فروی 2015ء) آسٹریلوی شہر برسبین میں شدید بارش کی وجہ سے کرکٹ ورلڈ کپ میں بنگلہ دیش اور آسٹریلیا کا میچ منسوخ کر دیا گیا ہے۔تفصیلات کے مطابق ٹورنامنٹ میں منسوخ کیے جانے والا پہلا میچ ہے۔میچ کی منسوخی کی وجہ سے دونوں ٹیموں کو ایک ایک پوائنٹ ملا ہے آسٹریلوی محکمہ موسمیات کی جانب سے کوئنزلینڈ میں آنے والے سمندری طوفان کی وجہ سے برسبین میں سنیچر کو شدید بارش کی پیشنگوئی کی گئی تھی۔

(جاری ہے)

ہفتہ کی صبح سے ہی شہر میں شدید بارش کا سلسلہ شروع ہو گیا جو وقفے وقفے سے جاری رہا۔امپائروں نے بارہا موسم کی صورتحال اور میدان میں کھیل کے امکانات کا جائزہ لینے کے بعد آخر کار میچ منسوخ کرنے کا ہی فیصلہ کیا۔ورلڈکپ 2015 کے منتظمین نے اس میچ کے ٹکٹ خریدنے والے شائقین کو ٹکٹ کے پیسے واپس دینے کا اعلان بھی کیا ہے۔میچ کی منسوخی کے بعد اب گروپ اے میں مزید ایک ایک پوائنٹ حاصل کرنے کے بعد آسٹریلیا اور بنگلہ دیش کی ٹیمیں بالترتیب دوسری اور تیسری پوزیشن پر آ گئی ہیں۔گروپ میں نیوزی لینڈ کی ٹیم تین میچوں میں تین فتوحات کے نتیجے میں چھ پوائنٹس کے ساتھ سرفہرست ہے۔