کرکٹ بورڈ تنقیدی نشتر برسانے والوں پر ٹوٹ پڑا

جمعہ 6 مارچ 2015 11:36

کرکٹ بورڈ تنقیدی نشتر برسانے والوں پر ٹوٹ پڑا
لاہور(اردو پوائنٹ تازہ ترین اخبار6مارچ ۔2015ء ) پی سی بی تنقیدی نشتر برسانے والوں پر ٹوٹ پڑا اور ٹیم کی شکست پر میچ فکسنگ کا شبہ ظاہر کرنے والے سابق ٹیسٹ کرکٹرز سرفراز نواز اور عامر سہیل کے ساتھ ساتھ سابق چیئر مین پاکستان کرکٹ بورڈ خالد محمود کو 10،10کروڑ روپے ہرجانے کے نوٹسز جاری کر دیئے گئے ہیں ۔

(جاری ہے)

تفصیلات کے مطابق ورلڈکپ کے ابتدائی دونوں میچز میں بھارت اور ویسٹ انڈیز سے بدترین شکستوں کے بعد ناقدین کی توپوں کا رخ پی سی بی اور کھلاڑیوں کی جانب ہو گیا تھا، ایسے میں بعض افراد نے فکسنگ کا شبہ بھی ظاہر کیا، اس حوالے سے نجم سیٹھی اور معین خان کی شخصیات کو نشانہ بنایا گیا۔

بورڈ نے اس کا نوٹس لیتے ہوئے گذشتہ روز سابق ٹیسٹ کرکٹرز عامر سہیل، سرفراز نواز اور سابق بورڈ چیف خالد محمود کو10،10کروڑ روپے ہرجانے کے قانونی نوٹس ارسال کر دیے، ان سے کہا گیا ہے کہ 14روز میں اپنے بیانات پر تحریری معافی مانگیں، بصورت دیگر قانونی چارہ جوئی کا آغاز کیا جائے گا۔ یاد رہے کہ چیف سلیکٹر معین خان کی کیسینو تنازع کے بعد وطن واپسی پر بھی بعض حلقوں نے شکوک ظاہر کیے تھے۔

متعلقہ عنوان :