سینیٹ الیکشن ، ن لیگ کے جاوید عباسی کو پی ٹی آئی کے بھی ووٹ پڑے کا انکشاف

جمعہ 6 مارچ 2015 17:18

اسلام آباد(اُردو پوائنٹ اخبار تازہ ترین۔6مارچ2015ء) سینیٹ الیکشن کے لیے خیبر پختونخوا میں تحریک انصاف اور ن لیگ کے درمیان خفیہ معاہدہ تھا یا پارٹی ڈسپلن کی خلاف ورزی کی گئی ، ٹیکنو کریٹ کی نشست پر ن لیگ کے امیدوار کو کامیاب کرایا گیا۔ جے یو آئی ، پیپلز پارٹی اور اے این پی کا اتحاد بھی رنگ لے آیا ۔ ذرائع کے مطابق سینیٹ انتخابات میں پی ٹی آئی اور ن لیگ کاخفیہ معاہدہ تھا ۔

بیلٹ پیپرز سے ظاہر ہوتا ہے کہ ٹیکنو کریٹ کی نشست پر ن لیگ کے جاوید عباسی کو پی ٹی آئی کے ووٹ بھی پڑے اور انہیں چالیس ووٹ حاصل ہوئے ۔ عمران خان کی جانب سے واضح ہدایات کے باوجود دوسری ترجیح میں جاوید عباسی کو ووٹ دیئے گئے ۔ ن لیگ کے ممبرز کی جانب سے پی ٹی آئی کی خواتین اور اقلیتی نشستوں کے امیدواروں کو دوسری ترجیح میں رکھا گیا ۔

(جاری ہے)

دوسری جانب جے یو آئی ، پیپلز پارٹی اور اے این پی کا اتحاد بھی رنگ لے آیا۔

پیپلز پارٹی کے خانزادہ خان نو ووٹ لے کر کامیاب ہوئے جبکہ ایوان میں پیپلزپارٹی کے ممبران کی تعداد صرف پانچ ہے ۔ سب سے بڑا اپ سیٹ قومی وطن پارٹی کے عمار احمد خان کی شکست ہے ۔ عمار احمد خان کو آٹھ ووٹ ملے جبکہ قومی وطن پارٹی کے ایم پی ایز کی تعداد دس ہے ۔ پانچ نشستوں والی پیپلز پارٹی تو اپنے سیٹ لے اڑی لیکن دس ایم پی ایز کی موجودگی کے باوجود قومی وطن پارٹی کو دو ووٹ کم ملنے کی وجہ سے شکست کا سامنا کرنا پڑا۔