برطانوی ٹینس کھلاڑی اینڈی مرے نے کیون اینڈرسن کو شکست دے کر اپنے کریئر کی 500 ویں جیت حاصل کرلی

لندن (اُردو پوائنٹ اخبار تازہ ترین۔یکم اپریل۔2015ء) برطانوی ٹینس کھلاڑی اینڈی مرے نے کیون اینڈرسن کو شکست دے کر اپنے کریئر کی 500 ویں جیت حاصل کرلی۔میڈیا رپورٹ کے مطابق وہ اس سنگ میل کو عبور کرنے والے پہلے برطانوی کھلاڑی بن گئے۔عالمی درجہ بندی میں تیسرے مقام پر موجود مرے نے جنوبی افریقہ کے اینڈرسن کو تین سیٹوں میں 4-6، 6-3، 3-6 سے شکست دیکر میامی اوپن کے کوارٹرفائنل میں پہنچے جیت کے ساتھ دنیائے ٹینس کے گرینڈ سلیم اور اوپن عہد میں اینڈی مرے 500 جیت حاصل کرنے والے 46 ویں کھلاڑی بن گئے۔

500 بار جیت کا سنگ میل حاصل کرنے والے تمام کھلاڑیوں میں سے صرف نو کھلاڑی ابھی بھی ٹینس کھیل رہے ہیں سکاٹ لینڈ سے تعلق رکھنے والے 27 سالہ اینڈی مرے نے اپریل 2005 میں اپنے پیشہ ورانہ کریئر کا آغاز کیا تھا اس طرح انھوں نے یہ کارنامہ دس سال سے ذرا کم وقفے میں انجام دیا۔

(جاری ہے)

مرے نے بتایا کہ میامی میں 500 ویں کامیابی سے ہم کنار ہونا بہت مناسب ہے کیونکہ وہ یہاں تربیت کیلئے زیادہ تر وقت گذارتے ہیں۔

انھوں نے کہا کہ میں اس کورٹ پر گذشتہ کئی برسوں کے دوران بہت سی تکلیفوں سے گذرا ہوں مجھے امید ہے کہ میں اس جیت کو محرک کے طور پر استعمال کرکے مزید میچز جیت سکتا ہوں۔ میرے خیال سے یہ میرا آخری میچ نہیں۔انہوں نے کہاکہ کسی کے کریئر کو جانچنے کے کئی طریقے ہو سکتے ہیں تاہم 800 سے 900 تک میچز جیتنا شاذو نادر اور مشکل امر ہوتا ہے۔ اس لیے یہ جیت آپ کو یہ حوصلہ دیتی ہے کہ اس ہدف پر نظر رکھیں بہر حال موجودہ دور کے کھلاڑیوں میں 33 سالہ راجر فیڈرر سب سے آگے ہیں۔

انھوں نے مجموعی طور پر 1012 میچز میں کامیابی حاصل کی ۔سر فہرست پانچ بار یوایس اوپن جیتنے والے جیمی کونرز لا نام سب سے اوپر ہے جن کی مجموعی کامیابیوں کی تعداد 1235 ہے۔موجودہ کھلاڑیوں میں رفیئل ندال نے 721 میچز میں کامیابی حاصل کی ہے تو نوواک جوکووچ نے 625 میچز جیت رکھے ہیں مرے کا مقابلہ آسٹریلیا کے 21 سالہ ڈومنک تھیئم سے ہوگا-