پیرس میں پاکستانی ٹرک آرٹ نمائش اختتام پذیر

ہفتہ 4 اپریل 2015 12:58

پیرس میں پاکستانی ٹرک آرٹ نمائش اختتام پذیر

پیرس(اُردو پوائنٹ اخبار تازہ ترین۔04 اپریل۔2015ء)پیرس میں پاکستانی سفارت خانے کی جانب سے پاکستانی ٹرک آرٹ کی نمائش جو کہ 24مارچ سے جاری تھی ، گزشتہ روز اختتام کو پہنچی- نمائش کی اختتامی تقریب ایفل ٹاور کے سائے میں منعقد کی گئی -دنیا بھر سے آئے ہوئے بیشمار سیاحوں نے پاکستانی ٹرک آرٹ کی یہ نمائش دیکھی-انھوں نے پاکستان کے اس رنگا رنگ فن کو سراہا نمائش میں ایک سکوٹر اور دو کاروں کے علاوہ فرانس کی سب سے بڑی ٹرانسپورٹ کمپنی آر اے ٹی پی کی جانب سے پیش کی گئی ایک بس بھی شامل تھی -ٹرک آرٹ کے مصوروں نے اس بس کے اوپر خوبصورت نقش و نگار بنائے جن میں پیرس اور پاکستان کی مشہور عمارتیں اور پھول بوٹے شامل تھے-اختتامی تقریب سے خطاب کرتے ہوئے فرانس میں پاکستان کے سفیر غالب اقبال نے کہا کہ پیرس کے لوگوں کی پاکستانی ٹرک آرٹ نمائش میں بے پناہ دلچسپی پاکستانی فن کی گہرائی ، رنگا رنگی اور روشن خیالی کی عکاس ہے - انھوں نے کہا کہ مغربی دنیا کے سامنے پاکستان کے فن کو اجاگر کرنا وقت کی اہم ضرورت ہے -بعد ازاں نمائش میں شامل گاڑیوں کے قافلے نے پیرس کی مشہور شاہراہ شانزے لیزے کا ایک چکر لگایا-دیکھنے والوں نے اس فن کو سراہا -آر اے ٹی پی کی جانب سے پیش کی گئی اس بس کو کچھ دنوں تک عام بس کی حیثیت سے پیرس کے مختلف روٹوں پر چلایا جائے گا اور بعد میں اس کو کمپنی کے عجائب گھر میں رکھا جائے گا