ملک میں بیرونی سرمایہ کاری1ارب76کروڑ ڈالر سے تجاوز کر گئی

کراچی(اُردو پوائنٹ اخبار تازہ ترین۔ 17اپریل۔2015ء) ملک میں رواں مالی سال کے پہلے 9 ماہ (جولائی تا مارچ) کے دوران براہ راست غیرملکی سرمایہ کاری میں 1فیصد کا بھی اضافہ نہ ہو سکا۔ اسٹیٹ بینک آف پاکستان کے اعدادوشمار کے مطابق 9ماہ کے دوران براہ راست غیرملکی سرمایہ کاری 70کروڑ 91 لاکھ ڈالر کے مقابلے میں 71کروڑ 1 لاکھ ڈالر رہی، گزشتہ مالی سال کے مقابلے میں رواں مالی سال کے اس عرصے کے دوران براہ راست غیرملکی سرمایہ کاری کی آمد (انفلوز) 20.6 فیصد کے اضافے سے 1ارب 89کروڑ 13لاکھ ڈالر جبکہ انخلا (آوٴٹ فلوز) کی مالیت 37.5 فیصد کے اضافے سے 1ارب 18کروڑ 10 لاکھ ڈالر رہی، اس طرح خالص ایف ڈی آئی 71کروڑ 1 لاکھ ڈالر تک محدود رہی۔

ماہرین کے مطابق ملک میں جاری توانائی کا بحران غیرملکی سرمایہ کاری میں کمی کا بنیادی سبب ہے حکومت بیک وقت دو محازوں پر جنگ لڑرہی ہے۔

(جاری ہے)

ملک میں جاری دہشت گردی کے خلاف جنگ اور توانائی کے بحران کا حل شامل ہیں، حکومت کے تمام تردعووٴں کے باوجود توانائی کے متبادل یا دیرپا ذرائع شروع نہیں ہوسکے، ایل این جی کی درآمد بھی خدشات کا شکار ہے جبکہ پڑوسی ملکوں سے بجلی کی درآمد پر بھی کوئی اہم پیش رفت نہیں ہوسکی، اس صورتحال میں غیرملکی سرمایہ کاری (ایف ڈی آئی) پر انخلا کا دباوٴ بڑھ رہا ہے اور غیرملکی سرمایہ کار کسی نئے پراجیکٹ کے بجائے موجودہ سرمایہ کاری کو جاری رکھنے پر توجہ دے رہے ہیں۔

اعدادوشمار کے مطابق رواں مالی سال کے پہلے 9 ماہ کے دوران ملک میں مجموعی غیرملکی سرمایہ کاری 118.7فیصد کے اضافے سے 1ارب 76کروڑ 50لاکھ ڈالر رہی، گزشتہ مالی سال مجموعی غیرملکی سرمایہ کاری 80کروڑ 70 لاکھ ڈالر رہی تھی، رواں مالی سال کے دوران مجموعی غیرملکی نجی سرمایہ کاری 8.9فیصد کے اضافے سے 81کروڑ 7 لاکھ ڈالر رہی جس میں 71کروڑ 1 لاکھ ڈالر کی ایف ڈی آئی بھی شامل ہے، پورٹ فولیو سرمایہ کاری 182.5فیصد کے اضافے سے 10کروڑ ڈالر رہی، غیرملکی پبلک انویسٹمنٹ 1427.5 فیصد کے اضافے سے 95کروڑ 45 لاکھ ڈالر رہی۔

اعدادوشمار کے مطابق رواں مالی سال کے پہلے 9ماہ کے دوران غیرملکی سرمایہ کاری کے لیے تیل و گیس کی تلاش کا شعبہ سب سے زیادہ پرکشش ثابت ہوا اور اس شعبے میں 20 کروڑ 43 لاکھ ڈالر کی سرمایہ کاری کی گئی، ٹیلی کمیونی کیشن کے شعبے میں 12کروڑ 53 لاکھ ڈالر، پاور سیکٹر میں 9کروڑ 72 لاکھ ڈالر کی سرمایہ کاری کی گئی جس میں سے 3 کروڑ 99 لاکھ ڈالر تھرمل پاور جبکہ 5 کروڑ 69 لاکھ ڈالر کی سرمایہ کاری ہائیڈل پاور کے شعبے میں کی گئی، فنانشل بزنس میں 8کروڑ 35 لاکھ ڈالر، ٹرانسپورٹ سیکٹر میں 4کروڑ 71 لاکھ ڈالر، کیمکل کے شعبے میں 6کروڑ ڈالر، ٹیکسٹائل کے شعبے میں 4کروڑ 23 لاکھ ڈالر، بیوریجز سیکٹر میں 5کروڑ 83 لاکھ ڈالر کی سرمایہ کاری کی گئی۔

پاکستان میں براہ راست غیرملکی سرمایہ کاری کے لحاظ سے امریکا، چین، متحدہ عرب امارات نمایاں رہے چین نے پاکستان میں 17کروڑ 83 لاکھ ڈالر، متحدہ عرب امارات نے 16کروڑ 33 لاکھ ڈالر جبکہ امریکا نے 17 کروڑ 53 لاکھ ڈالر کی سرمایہ کاری کی۔