ملک کے نام کے حوالے دائر مقدمہ میں بھارتی سپریم کورٹ نے حکومت سے جواب طلب کرلیا

نئی دہلی (اُردو پوائنٹ اخبار تازہ ترین۔ 25اپریل۔2015ء) بھارت کی سپریم کورٹ نے ملک کے نام حوالے سے دائر ایک درخواست پر مرکزی حکومت اور ریاستوں سے کہا ہے کہ وہ اپنا موقف عدالت کو بتائیں۔چیف جسٹس ایچ ایل دتا اور جسٹس ارون مشرا پر مشتمل سپریم کورٹ کے بینچ نے سماجی کارکن نرنجن بھٹوال کی جانب سے دائر ایک پٹیشن پر مرکزی حکومت اور سبھی ریاستوں سے ان کا موقف جاننے کیلئے انھیں نوٹس جاری کیا ۔

روزنامہ ہندو اور ٹائمز آف انڈیا کے مطابق مہاراشٹرا کے سماجی کارکن نرنجن بھٹوال نے مفاد عامہ کی درخواست میں موقف اختیار کیا کہ آزادی کے بعد قانون ساز اسمبلی نے نئی ریاست کیلئے مختلف ناموں پر غور کیا جن میں بھارت، ہندوستان، ہند، بھارت بھومی یا بھارت ورش شامل ہیں۔درخواست گذار کا موقف ہے کہ نام ’انڈیا‘ نوآبادیاتی دور میں گھڑا گیا ہے۔

(جاری ہے)

درخواست گذار نے عدالت سے آرٹیکل 1 میں ’انڈیا اور بھارت‘ کے الفاظ کی وضاحت مانگی ہے۔درخواست گذار کے وکلا نے عدالت کے سامنے اپنے دلائل میں کہا کہ لفظ انڈیا ’بھارتا‘ کا لفظی ترجمہ نہیں اور یہ ملک نہ صرف تاریخی طور پر بلکہ مذہبی کتابوں میں بھی ’بھارتا‘ کے طور پر جانا جاتا ہے۔درخواست گذار نے موقف اختیار کیا کہ ایک نام جو تاریخی طور بہت اہمیت کا حامل ہے وہ ہے ’بھارت‘۔ درخواست گذار چاہتا ہے کہ حکومت اس بات کی تصدیق کرے کہ لفظ ’انڈیا‘ کو محدود مقاصد کیلئے آئین میں شامل کیاگیا تاکہ اسے بیرونی ممالک میں باآسانی پہچانا جا سکے۔