عمران خان کی سیاست شرم و حیا سے عاری ہے،مولانا فضل الرحمان

ملتان(اُردو پوائنٹ اخبار تازہ ترین۔ 30اپریل۔2015ء) جے یو آئی (ف) کے سربراہ مولانا فضل الرحمان نے کہا ہے کہ پاکستان کے سعودی عرب کے ساتھ تعلقات کا تقاضا یہی ہے کہ ہم کسی شرائط کے بغیر اور کسی بھی آزمائش میں سعودی عرب کا ساتھ دیں ، یہ بات انہوں نے جمعرات کے روز مدرسہ قاسم العلوم ملتان میں میڈیا سے بات چیت کرتے ہوئے کہی ۔ انہوں نے کہا کہ حرمین شریفین سمیت تمام مقدس مقامات کی حفاظت کیلئے دنیا کا ہر مسلمان جان ومال دینے کو تیار ہے ۔

ایک سوال کے جواب میں انہوں نے کہا کہ گزشتہ روز سعودی عرب میں کی گئی وزراء کی برطرفیاں اور تبدیلیاں سعودی عرب کا داخلی معاملہ ہے انہوں نے مزید کہا کہ اس وقت چونتیس مستعفی لوگ ایوان میں جا کر بیٹھے ہیں وہ ہمارے اور ایوان کیلئے اجنبی ہیں جبکہ دوسری طرف دھاندلی کی تحقیقات کی جارہی ہیں ۔

(جاری ہے)

انہوں نے مزید کہا کہ جوڈیشل کمیشن کا بننا پاکستان بار کونسل کو غیر آئینی قرار دے چکی ہے اور پاکستان بار کونسل نے کہا ہے کہ یہ آئین سے متصادم ہے انہوں نے کہا کہ آئین میں الیکشن ٹربیونل کا وجود ہے جوڈیشل کمیشن کا نہیں انہوں نے ایک سوال کے جواب میں کہا کہ کے پی کے میں حکومت نام کی کوئی چیز نہیں ہے اور نہ ہی عوام کو کے پی کے حکومت سے کوئی توقع ہے عمران خان بارے سوال پر انہوں نے کہا کہ میں شریف آدمی ہوں اور مجھے شریف آدمی رہنے دیں عمران خان کی سیاست شرم و حیا سے عاری ہے ۔

انہوں نے مزید کہا کہ ملک میں دہشتگردی نہیں ہونی چاہیے اور کراچی میں جے یو آئی واحد جماعت ہے جس کا ٹارگٹ کلنگ اور بھتہ خوری سے کوئی تعلق نہیں ہے انہوں نے مزید کہا کہ کشمیر کو فرقہ واریت کی طرف دھکیلا جارہا ہے بھارت کا جرم اور جبر کشمیریوں پر جاری ہے اس کے باوجود حریت قیادت اپنے نظریے اور مطالبے پر قائم ہے ۔ انہوں نے مزید کہا کہ پاکستان سے ہی الحاق کا تصور کشمیریوں کا حتمی نظریہ ہے بھارت کی حکومت مختلف حربوں سے کشمیر کی مخالفت کو تسلیم کرنا چاہتی ہے مولانافضل الرحمان نے مزید کہا کہ پاکستان اور چین کے درمیان ہونے والے معاہدے پاکستان کی ترقی کیلئے ہیں اور خطے کی اقتصادی ترقی پر بھارت کو اعتراض نہیں ہونا چاہیے یہ معاہدے بجلی اور اقتصادی ہیں ۔