غلطی سے سرحد پار کرنیوالے شہری کے قتل پر پاکستان کا بھارت سے احتجاج

فہد شبیر ہفتہ 2 مئی 2015 23:37

اسلام آباد(اُردو پوائنٹ اخبارتازہ ترین۔2مئی۔2015ء) پاکستان نے شکرگڑھ سیکٹر میں غلطی سے سرحد پار کرنے والے شہری کے وحشیانہ قتل پر بھارت سے شدید احتجاج کیا ہے۔ بھارتی ہائی کمشنر کو دفتر خارجہ طلب کر کے احتجاجی مراسلہ حوالے کیا گیا۔ ترجمان دفتر خارجہ کا کہنا ہے بھارت اشتعال انگیز کارروائیوں سے گریز کرے۔پاکستان نے شکر گڑھ ورکنگ باؤنڈری پر غلطی سے سرحد پار کرنے والے شہری امانت علی کے بھارتی بارڈر سیکورٹی فورسز کے ہاتھوں وحشیانہ قتل پر بھارت سے شدید احتجاج کیا ہے۔

(جاری ہے)

بھارتی ہائی کمشنر کو دفتر خارجہ طلب کر کے پاکستانی شہری امانت علی کے قتل پر احتجاج ریکارڈ کرایا گیا۔ اس موقع پر پاکستانی حکومت کی طرف سے احتجاجی مراسلہ بھی بھارتی ہائی کمشنر کے حوالے کیا گیا۔ ترجمان دفتر خارجہ نے کہا ہے بھارتی فورسز کی جارحیت پر مبنی کارروائی کی شدید مذمت کرتے ہیں۔ پاکستانی شہری امانت علی غیرمسلح تھا اور غلطی سے سرحدی علاقے میں چلا گیا۔ بھارت عام شہریوں کی جانوں کا خیال کرے۔ ترجمان کا کہنا تھا بھارت آئندہ اشتعال انگیز کارروائیوں سے گریز کرے۔ امانت علی کو جمعہ کے روز شکر گڑھ ورکنگ باؤنڈی پر بی ایس ایف کے اہلکارروں نے فائرنگ اور بہیمانہ تشدد کر کے قتل کیا اور لاش رینجرز کے حوالے کی تھی۔