اچھے کرداروں کی بہت بھوکی ہوں‘ ودیا بالن

ممبئی (اُردو پوائنٹ اخبار تازہ ترین۔ 04 جون۔2015ء)مسلسل تین فلاپ فلموں ’شادی کے سائڈ ایفیکٹس،‘ ’گھن چکّر،‘ اور ’بابی جاسوس‘ کے بعد بالی وڈ اداکارہ ودیا بالن کی فلم ’ہماری ادھوری کہانی‘ ریلیز ہونے کو تیار ہے۔رواں ماہ کی 12 تاریخ کو نمائش کے لیے پیش ہونے والی اس فلم میں ان کے ساتھ عمران ہاشمی اور راجکمار راوٴ نظر آئیں گے۔

اس میں وہ ایک ہوٹل میں گل فروش کا کردار ادا کر رہی ہیں اور اس کے لیے انھوں نے ایک گل فروش کے ساتھ تربیت بھی حاصل کی ہے۔غیر ملکی خبررساں ادارے سے خصوصی بات چیت کرتے ہوئے ودیا بالن نے بالی وڈ میں اپنے ایک دہائی کے سفر کو یاد کرتے ہوئے کہاکہ اس سے بڑی بات کیا ہو سکتی ہے کہ میں دس جون کو انڈسٹری میں اپنے دس سال پورے کر رہی ہوں۔

(جاری ہے)

اس انڈسٹری میں میرا سفر بہت اچھا رہا۔

جتنے کی امید تھی اس سے کہیں زیادہ پایا۔اچھے لوگوں کے ساتھ کام کرنے کے کئی مواقع ہاتھ آئے۔ودیا بالن نے فلم پرینیتا کے ساتھ بالی وڈ میں قدم رکھا تھا اور اس میں ان کے ساتھ سیف علی خان تھے-انھوں نے مزید کہاکہ میں بالی وڈ میں صرف ایک فلم کرنا چاہتی تھی اور فلم پرینیتا کے ساتھ بہت خوش تھی لیکن اب دس سال اور 18 فلموں کے بعد بھوک پہلے سے بہت بڑھ گئی ہے۔

اپنے پرانے دنوں کو یاد کرتے ہوئے ودیا کہتی ہیں کہ آج میرا خاندان مجھ پر فخر کرتا ہے۔ میں کسی فلمی خاندان سے نہیں ہوں، اس لیے میرے خاندان کے لوگوں میں ایک قسم کا خوف تھا کہ لڑکی باہر جائے گی، فلموں میں کام کرے گی تو وہاں جو بھیڑیے ہوتے ہیں وہ اسے چھوڑیں گے نہیں۔ میرے خاندان والوں کے ذہن میں بالی وڈ کے بارے میں اس قسم کے خیالات تھے۔

ودیا بالن کو کئی فلموں کے لیے بہترین اداکارہ کے ایوارڈ سے نوازا جا چکا ہے’اسی لیے میری ماں میرے ساتھ ٹی وی سیریلز کے سیٹ پر میرے ساتھ آیا کرتی تھیں۔ لیکن جب میری ماں کو یہ احساس ہوا کہ دنیا اور ماحول کیسا بھی ہو اس سے فرق نہیں پڑتا، بس خود پر اعتماد اور اپنے کام کے متعلق لگن ضروری ہے۔ودیا کو ’پرینیتا،‘ ’ڈرٹی پکچر‘ اور ’کہانی‘ جیسی فلموں نے ایک نیا مقام عطا کیا ہے۔