ترک کمپنی کاسیاحوں کیلئے پہلا100فیصدحلال بحری جہازتیار

انقرہ(اُردو پوائنٹ اخبار تازہ ترین۔06اگست۔2015ء)ترکی میں ایک کمپنی نے اسلامی رجحان رکھنے والے افراد کو مدنظر رکھتے ہوئے 100 فیصد حلال بحری جہاز متعارف کروایا ہے۔ترکی کی سرکاری خبر رساں ایجنسی کے مطابق حلال بحری جہاز پر سفر کا آغاز ستمبر کے آخر میں ہو گا۔ جہاز میں مردوں اور عورتوں کے لیے الگ الگ سہولیات رکھیں گئی ہیں، جیسے ترکش حمام اور کھیلوں کے لیے مختص الگ الگ جگہیں وغیرہ۔

(جاری ہے)

جہاز پر سور کے گوشت سے بنی مصنوعات بھی دستیاب نہیں ہوں گی۔جہاز کی تزئین و آرائش میں اسلامی قواعد کا خیال رکھا گیا ہے۔ کمپنی کے پروجیکٹ منیجر نے بتایا کہ جہاز میں پینٹنگز بھی نہیں لگائی گئیں کیونکہ یہ اسلامی اقدار کے خلاف ہیں۔ابتدا میں جہاز پر چار رات تک قیام کرنے کے ساتھ ساتھ مسافروں کو رویڈس کے سیاحتی مقام پر سیر کی پیشکش بھی کی گئی ہے۔کمپنی کے جنرل مینجر نے کہا کہ یہ صرف ایک ایسا جہاز نہیں ہے جس پر شرب اور سور کے گوشت کی مصنوعات نہیں ہیں بلکہ یہ ایک ثقافتی اور تاریخی سفر ہو گا جس میں سماجی رابطہ بنانے کی فضا سازگار ہو گی۔