لاہور میں ہلکی بارش سے موسم خوشگوار ، اسلام آباد ، پشاور میں باران رحمت کی نوید

بدھ 12 اگست 2015 11:42

لاہور/ گوجرانوالہ / پشاور/ کشمیر(اُردو پوائنٹ اخبار تازہ ترین۔12اگست2015ء) لاہور میں ہلکی بارش سے موسم خوشگوار ہے ، محکمہ موسمیات نے اسلام آباد ، راولپنڈی ، گوجرانوالہ ، لاہور ، پشاور، کشمیر اور ژوب ڈویژن میں باران رحمت کی نوید سنائی ہے. شہر اقتدار اسلام آباد میں موسم گرم اور حبس برقرار ہے تاہم جڑواں شہروںاسلام آباد ، راولپنڈی میں آج دوپہر کے بعد کہیں کہیں گرج چمک کے ساتھ بادل برس سکتے ہیں باغوں کے شہر لاہور میں آسمان پر بادلوں کا راج ہے ، مختلف علاقوں میں صبح سویرے ہلکی پھوار کے باعث موسم خوشگوار ہے۔

(جاری ہے)

کراچی سمیت سندھ بھر میں آئندہ چوبیس گھنٹے کے دوران مطلع جزوی ابرآلود رہنے کا امکان ہے ۔ بالائی اور زیریں سندھ میں ہلکی بارش ہو سکتی ہے۔ موسم کا حال بتانے والوں کا کہنا ہے کہ آج اسلام آباد ، راولپنڈی ، گوجرانوالہ ، لاہور اور کشمیر میں کہیں کہیں جبکہ سرگودھا ، ہزارہ ، مالاکنڈ ، ڈی آئی خان ، پشاور ، مردان ، میرپور خاص ، قلات اور ژوب ڈویژن میں چند مقامات پر گرج چمک کیساتھ بارش کا امکان ہے۔