وفاقی وزیر خزانہ کو پی آئی اے کی سفری اور کارگو سروس بہتر بنانے کیلئے کی جانیوالی کوششوں کے بارے میں بریفنگ

سفری سہولیات کا معیار بڑھانے کی غرض سے بیڑے میں مزید طیارے میں شامل کرنے کی ضرورت ہے، مشیر ہوا بازی شجاعت عظیم

ہفتہ 22 اگست 2015 21:02

اسلام آباد (اُردو پوائنٹ اخبار تازہ ترین۔ 22 اگست۔2015ء) وفاقی وزیر خزانہ سینیٹر اسحاق ڈار کو ہفتہ کو قومی فضائی کمپنی پاکستان انٹرنیشنل ایئر لائنز (پی آئی اے) سفری اور کارکو سروس بہتر بنانے کیلئے کی جانیوالی کوششوں کے بارے میں بریفنگ دی گئی ۔ وزیراعظم کے مشیر شہری ہوا بازی شجاعت عظیم اور سیکرٹری ایویشن محمد علی گردیزی نے وزیر خزانہ سے اس سلسلہ میں ملاقات کی اور قومی فضائی کمپنی کو بین الاقوامی معیار کے مطابق لانے کیلئے نئی ایوی ایشن پالیسی کی روشنی میں کئے جانیوالے اقدامات سے آگاہ کیا جن میں سفری کارگو اور دیگر متعلقہ خدمات شامل ہیں ۔

وزیراعظم کے مشیر ہوا بازی نے وزیر خزانہ کو پی آئی اے کے موجودہ بیڑے کی استعداد کے بارے میں آگاہ کرتے ہوئے کہا کہ فضائی سفری سہولیات کا معیار بڑھانے کی غرض سے بیڑے میں مزید طیارے میں شامل کرنے کی ضرورت ہے ۔

(جاری ہے)

انہوں نے کہا کہ انکا یہ عزم ہے کہ ایوی ایشن کو ایک موثر آمدنی حاصل کرنیوالے شعبے میں بدل دیا جائے ۔ وزیر خزانہ نے ایوی ایشن کے شعبے کی ترقی کیلئے شجاعت عظیم اور انکی ٹیم کے فعال کردار کو سراہا۔ اسحاق ڈار نے کہا کہ موجودہ حکومت کا ویژن ہے کہ پی آئی اے کو نہ صرف ماضی کی بلندیوں تک بلکہ اس سے بھی آگے لیجایا جائے۔ اس موقع پر وزارت خزانہ اور ایوی ایشن ڈویژن کے اعلیٰ حکام بھی موجود تھے ۔

متعلقہ عنوان :