آپریشن ضرب عضب ‘ ملک اسحاق اور احمد لدھیانوی گروپ کے درمیان شدید اختلافات تھے
منگل 25 اگست 2015 14:35
اسلام آباد(اُردو پوائنٹ اخبار تازہ ترین۔ 25 اگست۔2015ء) دہشت گردی کے افسوس ناک واقعات اور آپریشن ضرب عضب کی وجہ سے احمد لدھیانوی کی کالعدم تنظیم اہل سنت والجماعت اور ملک اسحاق کے گروپ لشکر جھنگوی کے درمیان اختلافات تھے نجی ٹی وی کے مطابق 30 جولائی کو ملک اسحاق کی پولیس مقابلے میں ہلاکت نے ان اختلافات کو واضح کر دیا کیونکہ مبصرین کے مطابق اہل سنت والجماعت نے نا تو پولیس مقابلے کی مذمت کی اور نا ہی کسی قسم کا احتجاج کیا۔
میڈیا میں بھی صرف کوئٹہ میں ہونے والا ایک ہی قابل ذکر احتجاج رپورٹ ہوا ، جسں میں قانون نافذ کرنے والے اداروں نے کچھ مظاہرین کو حراست میں لیا۔اہل سنت والجماعت اسلام آباد کے ترجمان عنیب فاروقی نے بتایا کہ دہشت گردی، جارحیت اور دنگا فساد کی حمایت نہ کرنا پارٹی اور اس کے چیئرمین علامہ احمد لدھیانوی کی پالیسی ہے۔(جاری ہے)
انہوں نے دعوی کیا کہ راولپنڈی اور اسلام آباد میں 20 کارکنوں کی ہلاکت کے باوجود ان کی پارٹی نے چھوٹے موٹے مظاہروں کے علاوہ نقصان کرنے یا عوام کیلئے تکلیف کا سبب بننے والا قدم نہیں اٹھایا درحقیقت اہل سنت والجماعت کی خاموشی کی وجہ احمد لدھیانوی اور ملک اسحاق کے درمیان اختلافات بتائے جاتے ہیں۔
دونوں تنظیموں کے عہدے دار ان اختلافات سے انکار نہیں کرتے تاہم وہ ان کو ریکارڈ پر لانے سے گریزاں ہیں۔بظاہر ملک اسحاق اور ان کے حامی لدھیانوی سے خوش نہیں تھے ان اختلافات کا آغاز 14 سال جیل میں گزارنے کے بعد جولائی 2011 میں ملک اسحاق کی ضمانت پر رہائی سے ہوا۔لدھیانوی ملک اسحاق کی رہائی پر انہیں خوش آمدید کہنے جیل گئے اور دونوں نے بعد میں ایک ریلی سے بھی خطاب کیا۔تاہم ملک اسحاق کے مقاصد سامنے آنے کے بعد لدھیانوی کی انہیں ایک سیاسی لیڈر میں تبدیل کرنے کی خواہش پر پانی پھر گیا۔رہائی سے کچھ عرصہ پہلے ملک اسحاق سے ملاقات کرنے والوں میں مشہور عالم حافظ طاہر اشرفی بھی شامل تھے۔اشرفی نے بتایا کہ جب ملک اسحاق کی ضمانت منظور کی گئی تو میں نے انہیں اپنے طور طریقے بدلنے پر قائل کرنے کی کوشش کی۔وہ میری بات مان گئے تھے تاہم بعد میں اپنے پرانے ساتھیوں (لینڈ مافیا) اور سپاہ صحابہ پاکستان کے رہنماوٴں کے قائل کرنے پر ملک اسحاق مخالف راستے پر چل پڑے۔
ملک اسحاق سے 2013 میں ہونے والی آخری ملاقات کے دوران میں نے انہیں دو ٹوک الفاظ میں بتایا تھا کہ وہ لشکر جھنگوی ختم کرتے ہوئے اہل سنت والجماعت کی قیادت کا سیاسی مقابلہ کریں۔یقینا ملک اسحاق اور بہاولپور سے ان کے خاص معتمد غلام رسول کی اہل سنت والجماعت سے لڑائی کسی سے ڈھکی چھپی نہیں تھی۔تعلیم القرآن ایکشن کمیٹی کے سابق رکن اور جے یو آئی (ف )سے تعلق رکھنے والے مفتی اویس سے جب اس لڑائی بابت پوچھا گیا تو انہوں نے تصدیق کرتے ہوئے بتایا کہ مذہبی حلقوں میں اس پر غور ہوا تھاہم سب نے سنا تھا کہ ملک اسحاق سے سنگین خطرات لاحق ہیں کیونکہ وہ اور ان کے ساتھی راولپنڈی اور اسلام آباد کی اہم مساجد اور مدرسوں پر قبضہ چاہتے تھے رپورٹ کے مطابق دسمبر 2013 لاہور میں شمس الرحمان معاویہ کو گولی مار کر قتل کرنے کے واقعہ کے بعد ملک اسحاق کو اہل سنت والجماعت سے بے دخل کر دیا گیا اس ساری صورتحال پر نظر رکھنے والوں کے مطابق ملک اسحاق کو پارٹی سے نکالنے کی وجہ یہ تھی کہ اہل سنت والجماعت کی اعلی قیادت کو شک تھا کہ اس قتل میں وہ ملوث ہیں تاہم طاہر اشرفی پارٹی الیکشن میں شکست کی وجہ سے شمس الرحمان کو قتل کیے جانے کی سوچ سے اختلاف کرتے ہیں۔اس قتل کی وجہ پیسہ تھا کیونکہ وہ لینڈ مافیا کے انہی لوگوں سے خود ڈیل کرنا چاہتے تھے۔ کچھ مبصرین طاہر اشرفی کے اس اندازے سے اتفاق کرتے ہیں۔جھنگ میں اہل سنت والجماعت کے سیاسی حریف شیخ وقاص اکرم کا کہنا ہے کہ پارٹی اور اس کے وسائل پر قبضے کی لڑائی نے اندرون خانہ کئی گروپوں کو جنم دیاجن میں سب سے نمایاں ملک اسحاق اور لدھیانوی کے گروپ تھے۔شیخ وقاص کے مطابق، جیل سے رہائی کے فوراً بعد ملک اسحاق اور ان کے سابق ساتھیوں نے دعوی کرنا شروع کر دیا کہ اہل سنت والجماعت کی طاقت عسکریت پسندوں کی قربانیوں کا نتیجہ ہے۔تاہم لدھیانوی اور ان کے گروپ کا کہنا تھا کہ پارٹی کے حصے بخرے ہونے سے بچانے کیلئے انہوں نے سر توڑ کوشش کی۔کچھ حلقے تو یہاں تک دعوی کرتے ہیں کہ دونوں کے درمیان دشمنی کی وجہ سے کئی قتل بھی ہوئے۔حتی کہ انٹیلی جنس حکام یہ دعویٰ بھی کرتے ہیں کہ اہل سنت والجماعت کے عہدے دار ملک اسحاق گروپ کا حصہ بن جانے والے اپنے ہی پرانے ساتھیوں کا نشانہ بنتے رہے۔ایک انٹیلی جنس افسر نے بتایا کہ اہل سنت والجماعت کے صدر اورنگزیب فاروقی کو شدید خطرات لاحق ہیں اور اسی وجہ سے انہیں گرفتار کیا گیا۔فاروقی اور ان کے اہل خانہ کو اسلام آباد داخلے پر عائد پابندی کی خلاف ورزی پر 5 جون کو ٹیکسلا میں گرفتار کیا گیا تھا۔تاہم کچھ دن قبل فاروقی مری کے علاقے ایلوٹ میں ہونے والے جلسے میں مہمان خصوصی بنے اور راولپنڈی ضلع میں نقل و حرکت کرتے دکھائی دئیے۔انٹیلی جنس افسر نے مزید بتایا کہ فاروقی کی گرفتاری کی رات کچھ گھنٹوں کے احتجاج کے علاوہ پارٹی نے ان کی رہائی کیلئے نا تو دباوٴ ڈالا اور دو مہینے گزرنے کے باوجود نہ ہی ان کی ضمانت کیلئے عدالتوں میں سنجیدہ کوششیں کی گئیں۔ پارٹی حالات سے بخوبی آگاہ ہے اہل سنت والجماعت اسلام آباد کے ترجمان نے تصدیق کرتے ہوئے بتایا کہ پارٹی کی موجودہ پالیسی کے خلاف عسکریت پسندی کا رجحان رکھنے کے سبب چیئر مین علامہ لدھیانوی نے ملک اسحاق کو دسمبر 2013 میں پارٹی چھوڑنے کا کہا تھا۔مزید اہم خبریں
-
طویل عرصے بعد پی ٹی آئی لاہور اور پنجاب کے دیگر شہروں میں جلسے کرنے میں کامیاب
-
گندم کٹائی مہم کا افتتاح، مریم نواز نے گندم کی کچی فصل ہی کاٹ دی
-
اپوزیشن کا آصفہ بھٹو کی حلف برداری پر شور شرابے سے لگتا یہ ایک نہتی لڑکی سے خوفزدہ ہیں
-
وزیراعظم کی افغان ٹرانزٹ ٹریڈ کی آڑ میں اسمگلنگ میں ملوث افسران کو عہدے سے فوراً ہٹانے اور محکمانہ کارروائی کرنے کی ہدایت
-
امارات میں ایئرپورٹ پر پھنسے بیشتر مسافر وطن واپس پہنچ گئے، خواجہ آصف
-
عالمی مالیاتی اداروں کے حکام کا پاکستان کو آئی ایم ایف کا مختصر مدت کا پروگرام لینے کا مشورہ
-
عوام سے درخواست ہے کہ 21اپریل کو پی ٹی آئی امیدواروں کو ووٹ کاسٹ کریں
-
سعودی کمپنیوں کو تربیت یافتہ آئی ٹی ماہرین بھیجنے کے خواہاں ہیں،وزیر اعلیٰ مریم نواز سے ڈیجیٹل کوآپریشن آرگنائزیشن کے وفد کی ملاقات
-
وفاقی وزیر پٹرولیم ڈاکٹر مصدق ملک کی اماراتی سفیر حمد عبید الزعابی سے ملاقات ،باہمی دلچسپی کے امور پر گفتگو
-
صدرزرداری نے ساتویں بارپارلیمنٹ سے خطاب کرکے تاریخ رقم کی
-
سپیکر قومی اسمبلی نے ایوان میں باجا بجانے اور شور کرنے پر جمشید دستی اور اقبال خان کی رکنیت معطل کردی
-
اسٹیبلشمنٹ کو عمران خان سے بات کرنا ہوگی لیکن فی الحال کہیں برف نہیں پگھلی
UrduPoint Network is the largest independent digital media house from Pakistan, catering the needs of its users since year 1997. We provide breaking news, Pakistani news, International news, Business news, Sports news, Urdu news and Live Urdu News
© 1997-2024, UrduPoint Network
All rights of the publication are reserved by UrduPoint.com. Reproduction without proper consent is not allowed.