حکومت جاپان کی مالی امداد سے اسلام آباد کے مضافاتی علاقے میں تعمیر شدہ سکول ہاؤس آف لائٹ کا افتتاح

جمعرات 27 اگست 2015 21:28

اسلام آباد(اُردو پوائنٹ اخبار تازہ ترین۔ 27 اگست۔2015ء) حکومت جاپان کی مالی امداد سے اسلام آباد کے مضافاتی علاقے پنڈ بگوال میں تعمیر ہونے والے سکول ہاؤس آف لائٹ کا افتتاح پاکستان میں جاپان کے سفیر ہروشی انوماتا نے کیا،اس سکول کی تعمیر کیلئے حکومت جاپان نے ایجوکیشن سیکٹر میں کام کرنے والی غیر سرکاری تنظیم ہورائزن انٹرنیشنل ٹرسٹ کو گراس روٹس ہیومن سیکورٹی پراجیکٹس پروگرام(GGP)کے تحتUS$107,080 کی مالی امداد فراہم کی تھی،نئے تعمیر ہونے والے سکول کو اس طریقے سے ڈیزائن کیا گیا ہے کہ پری سکول سے ایلیمینٹری لیول کے تقریباً225بچے تعلیم حاصل کرسکیں۔

اس منصوبے کی وساطت سے علاقے کے بچے بچیوں کو نہ صرف تعلیم حاصل کرنے کے نئے مواقع میسر آئیں گے بلکہ اس سے علاقے کی سماجی ومعاشی ترقی میں بھی مدد ملے گی۔

(جاری ہے)

سکول کی افتتاحی تقریب سے خطاب کرتے ہوئے جاپان کے سفیر ہروشی انوماتا نے قوموں کی ترقی میں بنیادی تعلیم کی اہمیت پر زور دیتے ہوئے پاکستانی نوجوانوں کیلئے مواقع پیدا کرنے کی ضرورت کو بھی اجاگر کیا۔

انہوں نے اس امید کا اظہار کیا کہ موجودہ منصوبے سے نہ صرف علاقے کے بچوں کی فلاح وبہبود ہوگی بلکہ جاپان اور پاکستان کے تعلقات کو مزید مضبوط بنانے میں بھی مدد ملے گی۔GGPپروگرام حکومت جاپان کے اس یقین کی نشاندہی کرتا ہے کہ آج کی دنیا کو درپیش چیلنجز کے پیش نظر ترقیاتی امداد کو صرف حکومتوں تک محدود نہ رکھا جائے بلکہ سول سوسائٹی کے ذریعے نچلی سطح تک منتقل کیا جائے۔1989ء میں شروع ہونے والےGGPپروگرام کے تحت حکومت جاپان اب تک پاکستان میں 340منصوبوں کیلئے2.4بلین جاپانی ین فراہم کر چکی ہے

متعلقہ عنوان :