ویسٹ انڈین آل راونڈر آندرے رسل بھی پاکستان سپر لیگ کھیلنے پر رضامند ہوگئے

جمعہ 18 ستمبر 2015 16:19

لاہور (اردو پوائنٹ تازہ ترین اخبار18ستمبر ۔2015ء ) کرس گیل اور کیرون پولارڈ کے بعد ایک اور جارح مزاج آل راؤنڈر آندرے رسل نے پاکستان سپر لیگ(پی ایس ایل) کھیلنے پر آمادگی ظاہر کردی ہے ۔ اگلے سال قطر میں منعقد ہونے والے پاکستان سپر لیگ کے پہلے ایڈیشن میں دنیا بھر کے ٹی ٹونٹی سپیشلسٹ ایکشن میں نظر آئیں گے اورویسٹ انڈیز کے کرس گیل، ڈیرن سیمی، کیرون پولارڈ، ڈیوین براوو اور سنیل نارائن کی شمولیت کے بعد اب آل راؤنڈر آندرے رسل نے بھی لیگ کا حصہ بننے پر آمادگی ظاہر کردی ہے ۔

رسل کے علاوہ بقیہ ویسٹ انڈین کھلاڑیوں نے لیگ کیئے دستاویزات پر دستخط بھی کر دیے ہیں اور جلد وہ بھی کاغذی کارروائی مکمل کر لیں گے ۔ ویسٹ انڈین کھلاڑیوں کے علاوہ انگلینڈ کے سابق ٹیسٹ بلے باز کیون پیٹرسن اور سابق سری لنکن ٹیسٹ کرکٹر کمار سنگاکارا بھی لیگ کی ریس میں شامل ہوسکتے ہیں ۔

(جاری ہے)

کچھ رپورٹس کے مطابق انگلینڈ لیوک رائٹ اور روی بوپارہ، بنگلہ دیشی آل راؤنڈر شکیب الحسن، جنوبی افریقہ کے یوہان بوتھا اور لونوابے سوٹسوبے اور کیوی بلے باز جیسی رائیڈر ایونٹ کیلئے اپنی دستیابی ظاہر کر چکے ہیں جبکہ پی ایس ایل آفیشلز گلین میکسویل اور برینڈن میکولم جیسے کھلاڑیوں کو بھی شامل کرنے کا خواہاں ہے اور ذرائع کے مطابق اس سلسلے میں ان سے بات چیت جاری ہے ۔

یاد رہے کہ آئندہ سال فروری میں قطر کے دارلحکومت دوحا میں شیڈول پی ایس ایل کے پہلے ایڈیشن کیلئے لوگو اتوار کو لاہور میں لانچ کیا جائے گا ۔