سابق کپتان انضمام الحق بھی عامر کی انٹرنیشنل کرکٹ میں واپسی کے مخالف

بدھ 25 نومبر 2015 14:40

سابق کپتان انضمام الحق بھی عامر کی انٹرنیشنل کرکٹ میں واپسی کے مخالف

دبئی (اردو پوائنٹ تازہ ترین اخبار 25نومبر- 2015ء) جاوید میاں داد ،محمد حفیظ اور کیون پیٹرسن کے بعد اب پاکستان کرکٹ کے ایک اور بڑے اور معتبر کھلاڑی انضمام الحق نے بھی اسپاٹ فکسنگ میں سزا یافتہ فاسٹ بولر محمد عامر کی انٹر نیشنل کرکٹ کی واپسی کی سختی سے مخالفت کرتے ہوئے کہا ہے کہ ان کی واپسی سے پاکستان کرکٹ پر منفی اثرات پڑیں گے اور پہلے سے مشکلات سے دوچار پاکستانی کرکٹ ٹیم مزید پریشانی سے دوچار ہوسکتی ہے ۔

ایک انٹر ویو میں ماضی کے عظیم بیٹسمین اور سابق کپتان انضمام الحق نے کہا کہ یہ میری ذاتی رائے ہے اور اصل فیصلہ پالیسی سازوں نے کرنا ہے۔ انہوں نے کہا کہ ایک کھلاڑی جس نے کرپشن میں اپنے ہاتھ گندے کئے جیسے ہی وہ پاکستانی ٹیم میں آئے گا، سب سے پہلے ٹیم کی پریس کانفرنسوں میں اس بارے میں سوالات پوچھے جانے لگیں گے پھر پاکستان ٹیم انگلینڈ اور آسٹریلیا جیسے ملکوں میں ہونے والی سیریز میں کرکٹ سے زیادہ محمد عامر پر فوکس کرے گی اور عام تماشائی بھی محمد عامر پر آوازیں کسیں گے۔

(جاری ہے)

اس لئے میری ذاتی رائے ہی کہ سپاٹ فکسنگ کے بدنام زمانہ سکینڈل سے پاکستانی کرکٹ بڑی مشکل سے نکلی ہے اگر عامر یا دوسرے کھلاڑیوں کو واپس لے لیا گیا تو پاکستانی کرکٹ ٹیم کو انہیں بچانے کے لئے اپنی توانائیاں صرف کرنا پڑیں گی ۔ جب بھی پاکستانی ٹیم جیت کے قریب آکر میچ ہارے گی تو ٹیم کے بارے میں شکوک شبہات پیدا ہوں گے اس لئے محمد عامر کو انٹرنیشنل کرکٹ نہ کھلانا ہی پاکستان کرکٹ کے مفاد میں ہے ۔

متعلقہ عنوان :