عامر خان کو تھپڑ مارنے والے کو انعام دیا جائیگا،انتہاء پسند ہندوتنظیم شیو سیناء کا اعلان

لدھیانہ(اُردو پوائنٹ اخبارتازہ ترین - این این آئی۔26 نومبر۔2015ء) انتہا پسند ہندو تنظیم شیو سینا نے اعلان کیا ہے کہ جو بھی شخص بولی وڈ اداکار عامر خان کو تھپٹر مارے گا، اسے ایک لاکھ روپے انعام دیا جائے گا،بھارتی اخبار کی رپورٹ کے مطابق مذکورہ اعلان لدھیانہ میں ہوٹل ایم بی ڈے ریڈیسن بلیو کے باہر شیو سینا کے احتجاج کے دوران کیا گیا، جہاں عامر خان ٹھہرے ہوئے ہیں،شیو سینا پنجاب کے چیئرمین راجیو ٹنڈن نے دعویٰ کیاکہ جو بھی شخص عامر خان کو تھپڑ مارے گا، اسے ہر تھپڑ کے انعام میں ایک لاکھ روپے دیئے جائیں گے،ٹنڈن کا کہنا تھاکہ ہم ہوٹل کے مینیجر، ملازمین اور عامر خان کی فلم کی ٹیم کو بھی یہ موقع دے رہے ہیں کہ وہ عامر خان کو تھپڑ ماریں اور ہم سے ایک لاکھ روپے حاصل کریں، کوئی بھی باہمت اور محب الوطن شخص جو لدھیانہ میں عامر خان کو تھپڑ مارے گا، اسے ہماری جانب سے ہر تھپڑ پر ایک لاکھ روپے بطور انعام دیئے جائیں گے،لدھیانہ ویسٹ کے اسسٹنٹ کمشنر آف پولیس روپندر کور سرن نے بتایا کہ واقعے کے بعد ہوٹل کے باہر پولیس کی سیکیورٹی میں اضافہ کردیا گیا جبکہ 15 پولیس اہلکاروں پر مشتمل ایک کوئیک رسپانس ٹیم ہوٹل کے قریب پیڑولنگ میں مصروف ہے۔