امریکا اور چین کا گرین ہاوٴس گیسز کے اخراج پر قابو پانے کے لئے نئے عزم کا اظہار

پیرس۔ یکم دسمبر (اُردو پوائنٹ اخبارتازہ ترین - اے پی پی۔30 نومبر۔2015ء) امریکا اور چین نے گرین ہاوٴس گیسز کے اخراج پر قابو پانے کے لئے پیرس میں اقوام متحدہ کے موسمیاتی تبدیلی کانفرنس کے موقع پر ایک نئے عزم کا اظہار کیا ہے۔ذرائع ابلاغ کے مطابق امریکی صدر براک اوباما اور چین کے صدرشی جن پنگ کے درمیان کانفرنس کے پہلے دن الگ ملاقات ہوئی جس میں دونوں رہنماوٴں نے داعش کے خلاف جنگ، دونوں ممالک کے درمیان ٹیکنالوجی کی سلامتی، جنوبی چین میں بحری تنازعات کے پرامن حل سمیت کئی عالمی اور علاقائی مسائل پر تبادلہ خیال کیا۔

ملاقات کے بعد میں جاری ہونے والے ایک مشترکہ اعلامیے میں دونوں رہنماوٴں نے آلودگی پر قابو پانے کے حوالے سے گزشتہ برس کئے گئے وعدے پر عملدرآمد کیعزم کی تجدید کی اور کہا کہ یہ کانفرنس روایتی موسمیاتی تبدیلی کے چیلنجوں سے نمٹنے کا بہترین موقع ہے۔

(جاری ہے)

صدر اوباما نے کہا ہے کہ دنیا کی دو بڑی معیشتوں اور کاربن پیدا کرنے والے بڑے ممالک کی حثیت سے ان کی ذمہ داری ہے کہ وہ آلودگی کی روک تھام کے لئے مناسب اقدامات کریں۔دونوں رہنماوٴں کے درمیان بات چیت کے بعد وائٹ ہاوٴس نے اپنے بیان میں کہا کہ صدر اوباما نے ملاقات میں چین اور امریکا کے درمیان ستمبر میں حقوق دانش کی چوری کرنے والوں کی کسی صورت حمایت نہ کرنے اور علاقائی مسائل کو باہمی بات چیت سے حل کرنے عزم ظاہر کیا ہے ۔