حضرت علی بن عثمان الہجویری المعروف حضرت داتا گنج بخشؒ کے 972 ویں سالانہ عرس کا افتتاح

لاہور(اُردو پوائنٹ اخبارتازہ ترین - این این آئی۔یکم دسمبر۔2015ء )حضرت علی بن عثمان الہجویری المعروف حضرت داتا گنج بخشؒ کے 972 ویں سالانہ عرس کا افتتاح ہوا ۔ وفاقی وزیر خزانہ اسحق ڈار ،صوبائی وزیر اوقاف و مذہبی امور عطا محمد مانیکا اور صوبائی وزیر خوراک بلال یاسین نے رسم چادر پوشی سرانجام دے کر عرس کی 3 روزہ تقریبات کا باقاعدہ افتتاح کیا ۔

(جاری ہے)

ق س موقع پر ان کے ہمراہ ممبر قومی اسمبلی پرویز ملک ،سیکرٹری اوقاف و مذہبی امور نیئر اقبال ، ڈائریکٹر جنرل اوقاف و مذہبی امور ڈاکٹر طاہر رضا بخاری کے علاوہ دیگر مہمامان گرامی نے کثیر تعداد میں شرکت کی - تقریبات کا آغاز تلاوت قرآن پاک سے ہوا اور نعت خوانی ہوئی - رسم چادر پوشی کے بعد پاکستان کی سالمیت اور آپریشن ضرب عضب بارے دعا کی گئی اور دودھ کی سبیل کا افتتاح کیا گیا -اس موقع پر صوبائی وزیر نے صحافیوں سے گفتگو کرتے ہوئے کہا کہ حضرت داتا گنج بخشؒ الہجویری پوری دنیا کے لئے مرکز تجلیات منبع فیوض و برکات ہیں ان کی تعلیمات سے برصغیر کے اندھیروں میں اجالاپیدا ہوا اور انہوں نے اسلام کی شمع روشن کی - حضرت داتا گنج بخش کی تعلیمات سے آج برصغیر میں اسلام کے نام لیوا ہیں - انہوں نے کہا کہ عرس کے موقع پر لاکھوں کی تعداد میں زائرین کی آمد کے لئے بہترین انتظامات کئے گئے ہیں اور اس ضمن میں زائرین کی جان و مال کی حفاظت کے لئے فول پروف سیکورٹی انتظامات کئے گئے ہیں - انہوں نے کہا کہ زائرین کے کھانے پینے اور آرام کا خاص خیال رکھا گیا ہے اور سرکاری طو رپر لنگر بھی تقسیم کیا جا رہا ہے - بعد ازاں صوبائی وزیر اوقاف و مذہبی امور میاں عطا محمد مانیکا اور وفاقی وزیر خزانہ محمد اسحق ڈار نے لینگوئج / کمپیوٹر لیب کا افتتاح کیا - اس موقع پروزیر خزانہ اسحق ڈار نے جامعہ ہجویریہ داتا دربار میں لینگوئج اینڈ کمپیوٹر لیب کے لئے70 لاکھ روپے کی امداد کا اعلان کیا- انہیں بریفنگ کے دوران بتایا گیا کہ جامعہ ہجویریہ میں قدیم علوم اور جدید عصری فنون کا خوبصورت امتزاج ہے - یہاں پر سپوکن انگلش ، عربی ، کمپیوٹر سوفٹ ویئر ٹریننگ کرائی جائے گی ، کمپیوٹر ایپلی کیشن اینڈ آفس پروفیشنل ، کمپیوٹر ہارڈ ویئر اینڈ نیٹ ورک پروفیشنل و موبائل رپیئرنگ کے کورس بھی کر دائے جائیں گے -