پاکستان کرکٹ ٹیم نے انگلینڈ کیخلاف تیسرے ٹی ٹوئنٹی میچ میں سپر اوور میں کم ترین اسکور کا بدترین ریکارڈ اپنے نام کر لیا

بدھ 2 دسمبر 2015 15:14

شارجہ(اُردو پوائنٹ اخبارتازہ ترین - آئی این پی۔02 دسمبر۔2015ء) پاکستان کرکٹ ٹیم نے انگلینڈ کے خلاف تیسرے ٹی ٹوئنٹی میچ میں سپر اوور میں کم ترین اسکور کا بدترین ریکارڈ اپنے نام کر لیا۔ شارجہ میں پیر کو کھیلے گئے میچ میں انگلینڈ نے پہلے کھیلتے ہوئے پاکستان کو 155 رنز کا ہدف دیا تاہم متعدد اتار چڑھاو کے بعد پاکستانی ٹیم بھی مقررہ اوورز میں 154 رنز ہی بنا سکی اور میچ ٹائی ہو گیا۔

(جاری ہے)

اس کے بعد میچ کا فیصلہ قانون کے مطابق سپر اوور پر کیا گیا، یہ پہلا موقع تھا کہ انگلینڈ کی ٹیم نے کسی ٹی ٹوئنٹی میچ کو ٹائی کیا ہو. پاکستانی ٹیم سپر اوور میں ایک وکٹ کے نقصان پر صرف تین رنز بنا سکی جبکہ کپتان شاہد آفریدی تین گیندوں پر کوئی بھی رن نہ بنا سکے۔ انٹرنیشنل ٹی ٹوئنٹی میں اب تک ہونے والے مقابلوں میں سپر اوور میں کسی بھی ٹیم کا یہ سب سے کم اسکور ہے۔ انگلینڈ نے چار رنز کا ہدف ایک گیند قبل حاصل کر کے میچ میں فتح حاصل کرنے کے ساتھ ساتھ سیریز میں بھی3-0 سے کلین سوئپ مکمل کر لیا۔

متعلقہ عنوان :