امریکی گرین کارڈ حاصل کرنے والے اسلامی ممالک میں پاکستان سر فہرست

واشنگٹن(اُردو پوائنٹ تازہ ترین ۔۔ آئی پی اے ۔۔10 دسمبر۔2015ء) امریکی گرین کارڈ حاصل کرنے والے اسلامی ممالک میں پاکستان سر فہرست ہے،گزشتہ پانچ سالوں کے دوران 83ہزار پاکستانی تارکین وطن نے امریکی گرین کارڈ حاصل کیا۔امر یکہ نے 2009 اور 2013 کے درمیان6لاکھ 80ہزار مسلم اکثریتی ممالک سے تعلق رکھنے والے تارکین وطن کو گرین کارڈ جاری کیے۔دیگر اسلامی ممالک کے مقابلے میں پاکستان، عراق اور بنگلہ دیش کے تارکین وطن نے گزشتہ پانچ سالوں میں امریکہ کی طرف سے سب سے زیادہ گرین کارڈ حاصل کیے۔

امریکی جریدے کی رپورٹ کے مطابق گزشتہ پانچ برس کے دوران امریکا کا گرین کارڈ حاصل کرنے والے پہلے پانچ مسلم ممالک میں پاکستان ، عراق، بنگلادیش،ایران اور مصر شامل ہیں۔ توقع کی جارہی ہے کہ امریکہ آئندہ پانچ برسوں مسلم اکثریتی ممالک سے تعلق رکھنے والے تارکین وطن 6لاکھ66ہزارگرین کارڈ جاری کرے گا۔

(جاری ہے)

تاہم حالیہ کیلی فورنیا حملوں کے بعدامریکہ کی طرف سے گرین کارڈ کے حوالے سے تشویش پائی جارہی ہے۔

ان حملوں میں ملوث ایک پاکستانی خاتون تشفین ملک جو گزشتہ موسم گرما میں اپنے منگیتر کے ساتھ امریکہ آئی اور اس کے بعد انہوں نے گرین کارڈ حاصل کیا۔ امریکی امیگریشن پر سینیٹ کی ذیلی کمیٹی اور ہوم لینڈ سیکورٹی کی طرف سے تیار ایک چارٹ کے مطابق سال 2009 اور 2013 کے درمیان 83ہزار پاکستانی تارکین وطن کو گرین کارڈ دیئے گئے،اتنی تعداد میں عراقی تارکین وطن کو بھی امریکی گرین کارڈ جاری کیے گئے۔

بنگلہ دیش کے 75ہزار ، ایران کے 73ہزار اور مصر کے45ہزار تارکین وطن نے امریکی گرین کارڈ حاصل کیے۔گزشتہ پانچ برس کے دوران تین درجن سے زائد مسلم ممالک کے ہزاروں تارکین وطن کو گرین کارڈ دیئے گئے۔ جن میں صومالیہ سے تعلق رکھنے والے31ہزار، ازبکستان کے24ہزار، ترکی کے 22ہزار،مراکش کے22ہزار، اردن کے20ہزار،البانیہ کے20ہزار،لبنان کے16ہزار،یمن کے16ہزار اور انڈونیشیا کے15ہزار تارکین وطن نے امریکی گرین کارڈ حاصل کیا۔