حالیہ بار ش فصلوں کے لئے سونا ، 8 جنوری کو ملک میں بارشوں کا نیا سلسلہ شروع ہونے والا ہے ، ڈی جی موسمیا ت

اسلام آباد (اُردو پوائنٹ اخبارتازہ ترین - آن لائن۔04 جنوری۔2016ء) محکمہ موسمیات کے ڈائریکٹر جنرل ڈاکٹر غلام رسول نے کہا ہے کہ ملک میں حالیہ بارشوں کے باعث خشک سالی میں کمی آئی ہے اور یہ فصلوں کے لئے سونا ثابت ہو رہیہے ۔ 8 جنوری کو ملک میں بارشوں کا نیا سلسلہ شروع ہونے والا ہے ان خیالات کا اظہار آن لائن سے گفتگو کرتے ہوئے کیا انہوں نے کہا ہے کہ ملک میں جاری بارشوں کا سلسلہ گزشتہ رات سے بند ہو چکا ہے یہ سلسلہ مغربی لہر کے ذریعے شروع ہوااور بلوچستان سے ہوتے ہوئے کے پی کے کے جنوبی علاقوں سے ہوتے ہوئے پنجاب کے شمالی علاقوں سمیت گلگت بلتستان اور کشمیر تک بارشوں برف باری کا باعث بنی انہوں نے کہا کہ بلوچستان میں 5 سے 10ملی میٹر بارش ہوئی ہے جبکہ 4 سے 6 انچ برف باری ہوئی ہے ایک سوال کے جواب میں انہوں نے کہا کہ بارشوں کا یہ سلسلہ کمزور تھا مگر آہستہ رفتار سے بارش ہونے کی وجہ سے تمام بارشوں کا پانی زمین میں جذب ہو گیا ہے جو خشک سالی سے متعلقہ فصلوں کے لئے سونا ثابت ہوگی اور اس سے مفید ہونے والی فصلوں میں سرفہرست گندم ، چنا اور سرسوں ، مسور ، مونگ اور چارے کی فصلیں شامل ہیں ۔

(جاری ہے)

ڈاکٹر غلام رسول نے کہا کہ 8 جنوری سے ملک میں بارشوں کا ایک سلسلہ شروع ہونے والا ہے جو بلوچستان کے پی کے ، پنجاب ، کشمیر اور گلگت بلتستان میں درمیانی مقدار کی بارش اور برف باری کا باعث بنے گا انہوں نے کہا کہ مری اور گلیات میں برف باری سے لطف اندوز ہونے کے لئے عوام 8 جنوری کو ان علاقوں کی سیاحت کے لئے منصوبہ بندی کر سکتے ہیں ۔