جمہوریت کی مضبوطی کیلئے ہر ایک کو اپناکردار ادا کرنا چاہیے، تسلیم کرنا ہوگا سیاستدانوں اور اسٹیبلشمنٹ سے غلطیاں ہوئیں

‘پارلیمانی کمیٹی کو ججز کی تقرری میں محدو د کردار دیا گیا‘بلاول بھٹو زرداری کا لاہورہائی کورٹ بار ایسوسی ایشن سے خطاب

Umer Jamshaid عمر جمشید پیر 11 جنوری 2016 13:27

لاہور(اُردو پوائنٹ تازہ ترین ۔۔ آئی پی اے ۔۔ 11 جنوری۔2015ء) پاکستان پیپلز پارٹی کے چیئرمین بلاول بھٹو زرداری نے کہا کہ جمہوریت کی مضبوطی کیلئے ہر ایک کو اپناکردار ادا کرنا چاہیے، تسلیم کرنا ہوگا سیاستدانوں اور اسٹیبلشمنٹ سے غلطیاں ہوئیں۔لاہور ہائیکورٹ بار کی تقریب سے خطاب کرتے ہوئے بلاول نے کہا کہ پارلیمانی کمیٹی کو ججز کی تقرری میں محدو د کردار دیا گیا 2010 سے 2013تک 126 ججز کی تقرریاں کی گئیں ،8تقرریوں پر پارلیمانی کمیٹی کو اعتراضات تھے ،جوڈیشل کمیشن نے رد کردیے، ججز کی تقرری میں صدر اور وزیراعظم کا کردار نمائشی ہے۔

انہوں نے کہ آئین کے تحت قانون سازی پارلیمنٹ کی ذمہ داری ہے، پارلیمنٹ کی قانون سازی کے اختیارات پر اعتراضات پر میں حیران ہوں۔انہوں نے کہا کہ میری والدہ بی بی شہید کی وزارت عظمی کے دور میں خواتین کو بنچ میں تعینات کیا گیا۔

(جاری ہے)

کرپشن کے خلاف کارروائی پر بلاول بھٹو زرداری کا کہنا تھا کہ کرپشن سنجیدہ ایشو ہے ، اس کیخلاف کارروائی میں مقدس گائے آڑے نہیں آنی چاہیے،کرپشن کے خلاف کیسز میں دہرا معیار نہیں اپنانا چاہیے۔

انہوں نے کہا کہ جمہوریت کی مضبوطی کیلئے ہر ایک کو اپناکردار ادا کرنا چاہیے، اجتماعی طور پر ناکامیوں کی ذمیداریاں ہم سب پر عائد ہوتی ہیں۔بلاول بھٹو کا کہنا تھا کہ لاہورہائیکورٹ بار جمہوری جدوجہد میں اہم حیثیت رکھتی ہے ، لاہور ہائی کورٹ بار نے جمہوریت کا پرچم بلند رکھا ،قائد اعظم محمد علی جناح اور میرے نانا ذو الفقار علی بھٹو بڑے وکیل تھے۔

بلاول نے کہاکہ سیاستدانوں کو وکلا سے جمہوریت کا سبق سیکھنا ہوگا ، میں آج وکلا کے درمیان موجود ہوں اور اس کو اپنی خوش قسمتی سمجھتا ہوں ، بلاول بھٹو نے کہا کہ ماضی میں پیپلز پارٹی کے وزرا کے خلاف بھی کئی بڑے فیصلے کئے گئے جن کو ہم نے تسلیم کیا ، ہمیں یہ تسلیم کرنا ہوگا کہ ماضی میں عدلیہ سے بھی بڑی غلطیاں ہوئی ہیں مگر انصاف کی فراہمی میں ناکامی کی ذمہ داری اجتماعی طور پر ہم سب پر عائد ہوتی ہے ، بلاول بھٹو نے لاہور ہائیکورٹ بار کو شاندار الفاظ میں خراج تحسین پیش کیا اور کہا کہ آمریت کیخلاف جدوجہد میں وکلا اورلاہور ہائیکورٹ بار نے بے مثال کردار ادا کیا ، بلاول بھٹو نے کہا کہ ججز کی تقرری میں صدر اور وزیر اعظم کا کردار علامتی ہے ، انہوں نے کہا کہ ملک میں کرپشن ایک بڑا مسئلہ ہے اور اس کے خاتمے کیلئے ٹھوس اقدامات کرنا ہوں گے۔

اس سلسلے میں حکومت قانون سازی کرنے کی ذمہ داری ادا کرے۔

متعلقہ عنوان :