اسلام آباد ،خیبرپختونخوا، پنجاب ، کشمیر اورگلگت بلتستان میں بارش اور برفباری سے موسم مزید سرد

اسلام آباد /گلگت /چترال (اُردو پوائنٹ اخبارتازہ ترین - آئی این پی۔30 جنوری۔2016ء ) اسلام آباد ،خیبرپختونخوا، پنجاب ، کشمیر اورگلگت بلتستان میں بارش اور برفباری سے موسم مزید سردہوگیا ، چترال میں برفباری سے لواری ٹنل میں گاڑیاں پھنس گئیں ،مسافروں کو مشکلات کاسامنا رہا،گلگت بلتستان میں وقفے وقفے سے برفباری سے لوگ گھروں تک محدود ہوگئے ،کئی مقامات پر رابطہ سڑکیں بند ہوگئیں،محکمہ موسمیات نے آئندہ 24گھنٹوں کے دوران مالاکنڈ، ہزارہ، پشاور، فاٹا، اسلام آباد، سرگودھا، لاہور ڈویژن، گلگت بلتستان اورکشمیر میں کہیں کہیں بارش اور پہاڑوں پر برفباری کی پیشگوئی کی ۔

آزاد کشمیر اور بلوچستان کے شمالی علاقوں میں برفباری اور بارش کا سلسلہ تھم گیا ۔گلگت بلتستان کے ضلع دیامر میں وقفے وقفے سے برفباری جاری رہی ۔

(جاری ہے)

جس کی وجہ سے لوگ گھروں تک محدود ہوگئے ۔ہنزہ نگر میں سرد اور ٹھنڈی ٹھنڈی ہوائیں چل رہی ہیں۔غذر میں برفباری کا سلسلہ تھم گیا ۔کئی مقامات پر رابطہ سڑکیں بند ہوگئیں ۔چترال میں بھی وقفے وقفے سے برفبار ی سے گزشتہ روز سے کئی گاڑیاں لواری ٹنل پر پھنس گئیں۔

مالاکنڈ ڈویژن کے دیگر علاقوں میں برفباری رک گئی ۔ ۔محکمہ موسمیات کے مطابق آئندہ 24گھنٹوں کے دوران مالاکنڈ، ہزارہ، پشاور، فاٹا، اسلام آباد، ، سرگودھا، لاہور ڈویژن، گلگت بلتستان اورکشمیر میں کہیں کہیں بارش اور پہاڑوں پر برفباری کا امکان ہے۔ ریکارڈ کیے گئے نقطہ انجماد سے کم درجہ حرارت پاراچنارمنفی 05، گوپس منفی 04،مالم جبہ منفی 03 ، مری، سکردو، استور، کوئٹہ منفی02 ، راولاکوٹ اور قلات منفی 01ڈگری سینٹی ریکارڈ کیا گیا۔

گزشتہ24 گھنٹوں کے دوران صوبوں سے ریکارڈ کی گئی بارش/برفباری خیبرپختونخواہ: بالاکوٹ43 ، کاکول 31، دیر 29 ، پٹن 25 ، کالام 19، پاراچنار18، جبکہ مالم جبہ02 انچ برفباری، پنجاب مری 34 ، لاہور سٹی15 ، لاہورائیرپورٹ 12 ، اسلام آباد (سیدپور28، زیرو پوائنٹ12، گولڑہ08، بوکرہ07)، راولپنڈی (شمس آباد 11، چکلالہ14)،منگلہ 06 جبکہ مری 05 انچ برفباری، کشمیر میں راولاکوٹ34 ، گڑھی دوپٹہ 29 ، مظفرآباد 25 ، کوٹلی 18 ، گلگت بلتستان میں سکردو 04 جبکہ استور میں 02 انچ برفباری ہوئی۔