پاکستان اور بھارت کے درمیان کرکٹ تعلقات میں کشیدگی کم نہ ہوسکی

نئی دہلی (اُردو پوائنٹ اخبارتازہ ترین - این این آئی۔02 فروری۔2016ء) پاکستان اور بھارت کے درمیان کرکٹ تعلقات میں کشیدگی کم نہ ہوسکی بھارت نے پاکستان کے ساتھ 8سال میں 6ٹیسٹ سیریز کھیلنے کے بارے میں مفاہمت کی یادداشت پر دستخط کر رکھے ہیں اور اس سلسلے کی پہلی سیریز گذشتہ سال کھیلی جانی تھی جو نہ ہوسکی۔پاکستان کرکٹ بورڈ نے بھارت کیخلاف عہد شکنی کا کیس انٹرنیشنل کرکٹ کونسل کے سامنے پیش کرنے کا فیصلہ کیا ہے۔

ذرائع کے مطابق جمعے کو لاہور میں پی سی بی گورننگ بورڈ میٹنگ میں چیئرمین شہریار خان نے اراکین کو ایک گھنٹے تک اس قرار داد کی بریفنگ دی۔ارکان کو بتایا گیا کہ آئی سی سی سے انصاف نہ ملا تو یہ مقدمہ کھیلوں کی عالمی ثالثی عدالت میں بھی جاسکتا ہے ‘پاکستان کرکٹ بورڈ سیریز نہ ہونے پر اپنے نقصان کی تلافی کے لئے آئی سی سی کے ضابطہ اخلاق کے تحت تنازع طے کرنے کیلئے قرارداد آئی سی سی بورڈ میٹنگ میں پیش کرنے کی تیاریاں مکمل کر لی ہیں۔

(جاری ہے)

اجلاس میں پاکستان بگ تھری سے متعلق تحفظات ظاہر کریگا ‘کرکٹ بورڈ کا بگ تھری کے متنازع اصلاحات کی حمایت سے احتجاجاً دستبردار ہونے کا امکان ہے۔ شہریار خان اور چیف ایگزیکٹیو آفیسر سبحان احمد قانونی مشیروں سے مشاورت سے مضبوط کیس تیار کرکے دبئی پہنچ چکے ہیں۔یاد رہے کہ پاکستان کرکٹ بورڈ کے اس وقت کے چیئرمین ذکا اشرف نے آئی سی سی بگ تھری انتظامی ڈھانچے کے حق میں ووٹ نہیں دیا تھااس کے بعد ذکا اشرف کو ہٹا کر نجم سیٹھی کو پی سی بی چیف مقرر کیا گیا تھا۔ انہوں نے آئی سی سی میں بگ فور درجہ ملنے کے ساتھ بڑی مراعات حاصل کرنے کا بھی دعویٰ کیا تھا۔