پی آئی اے کے ملازمین کی جانب سے ادارے کی نجکاری کے خلاف احتجاج 11 ویں روز میں داخل

جمعرات 4 فروری 2016 13:51

اسلام آباد /پشاور /کوئٹہ /لاہور (اُردو پوائنٹ اخبارتازہ ترین - این این آئی۔04 فروری۔2016ء) پاکستان انٹرنیشنل ایئرلائن کے ملازمین کی جانب سے ادارے کی نجکاری کے خلاف احتجاج 11 ویں روز میں داخل ہوگیا ‘ مسلسل تیسرے روز فلائٹ آپریشن بند ہونے سے 100 سے زائد اندرون اور بیرون ملک پروازیں منسوخ ہو چکی ہیں ‘ آپریشن مکمل طورپر بند رہا ‘ دفاتر میں تالے لگادیئے گئے ‘ فلائٹ آپریشن بند ہونے کے باعث پی آئی اے کے سیکڑون ملازمین اور مسافر دنیا بھر کے مختلف ہوائی اڈوں پر پھنس گئے ۔

تفصیلات کے مطابق پاکستان کے سب سے بڑے شہر کراچی کے جناح انٹرنیشنل ایئرپورٹ پر پی آئی اے کا فلائٹ آپریشن مکمل طور پر بند رہا ‘دفاتر میں تالے لگے ہوئے ہیں، جناح ٹرمینل سے اسلام آباد ‘لاہور ‘گوادر ‘سکھر اور پشاور کی پروازیں منسوخ کردی گئی ہیں ‘ کراچی سے لندن ‘کھٹمنڈو ‘ڈھاکہ اور نئی دہلی کی فلائٹس بھی روک دی گئی ہیں ‘ فلائٹ آپریشن بند ہونے کے باعث پی آئی اے کے سیکڑون ملازمین اور مسافر دنیا بھر کے مختلف ہوائی اڈوں پر پھنس گئے دوسری جانب کراچی میں قومی ایئر لائن کے ہیڈ آفس کے سامنے پی آئی اے کی جوائنٹ ایکشن کمیٹی کا ادارے کی نجکاری کے خلاف احتجاج جاری رہا جس میں ملازمین کی بڑی تعداد موجود تھے۔

(جاری ہے)

لاہور کے علامہ اقبال انٹرنیشنل ایئرپورٹ پربھی پی ائی اے کا فضائی آپریشن مکمل طور پر معطل رہا اور ایئرپورٹ سے قومی و بین الاقوامی تمام پروازیں منسوخ کر دی گئیں ‘ لاہور سے دوحا ‘ریاض، دبئی، لندن، مسقط، مدینہ، ابوظہبی، بحرین، ٹوکیو، دمام، کویت اور جدہ جانے والی پروازیں منسوح کردی گئی ہیں ‘ اس کے علاوہ کراچی جانے والی 4 ‘ اسلام آباد کی 3 اور سکھر کی ایک پرواز بھی منسوح ‘ اندرون و بیرون ملک سے لاہور آنے والی 20 پروازیں منسوخ ہوگئی ہیں۔

راولپنڈی کے بینظیر انٹرنیشل ایئرپورٹ سے بھی 30 پروازیں منسوخ کر دی گئیں ‘ کراچی سے آنے والی 4 جب کہ کراچی جانے والی 3 پروازوں کی آمد و روانگی غیر یقینی ہے ‘ اس کے علاوہ اسلام آباد ایئرپورٹ سے بیرون ملک کی 24 گھنٹے میں 20 پروازیں منسوخ ہو چکی ہیں۔پشاور اور کوئٹہ کے ایئرپورٹس پر بھی فلائٹ آپریشن مکمل طور پر معطل ہونے کی وجہ سے نجی ایئرلائن نے کرایوں میں من مانا اضافہ کردیا ‘ پی آئی اے کی ہڑتال کے باعث ہزاروں مسافر متاثر ہو رہے ہیں ‘ 10 روز میں قومی خزانے کو 3 ارب سے زائد کا نقصان ہو چکا ہے۔

متعلقہ عنوان :